Qazaqstan musylmandary dini basqarmasy toidaǵy ýaǵyzǵa qatysty málimdeme jasady, dep habarlaidy dalanews.kz.
«Mýzyka – haram, al ánshiler – shaitannyń azanshysy» degen mazmunda toida pikir bildirgen adamnyń sózi áleýmettik jelide keńinen tarap, qoǵam arasynda túsinbeýshilik týǵyzǵan bolatyn.
Islam dini danalyqpen nasihat aitýǵa, ózgelerdi aýyr sózben aiyptamaýǵa, bireýdiń ar-namysyna qurmetpen qaraýǵa úndeidi. Sondyqtan qandai da dini máselege qatysty óner ókilderin jalpylama aiyptaý nemese olarǵa aýyr sipattamalar berý durys emes. Sonymen qatar analarymyzdy, qyz-kelinshekterdi beiádep sózben kemsitý de óreskel qatelik dep sanaimyz. Adamdy arsyzdyqqa, azǵyndyqqa jáne shariǵat tyiym salǵan isterge úndeitin ánderdi dinimiz quptamaidy. Alaida dinimiz ben dástúrimizdiń asyl qundylyqtaryn dáripteitin, Otandy qorǵaýǵa, ata-anany qadirleýge úndeitin, adamgershilik pen izgilikke shaqyratyn ánderge ruqsat beriletini jaiynda Islam ǵalymdarynyń pikiri bar, - deidi basqarma ókilderi.
Qazaqstan musylmandary dini basqarmasy elimizdegi musylman qaýymyn, barsha halyqty árqashan ózara qurmetke, parasatqa, kórkem minezge jáne birlikke úndep keledi.
Osy rette taǵy da el azamattaryn sóz jaýapkershiligine den qoiýǵa, dini máselelerde tek resmi dini qyzmettegi bilikti ǵalymdardyń túsindirmesine súienýge jáne qoǵamnyń aýyzbirshiligin saqtaýǵa shaqyramyz, - delingen jaýapta.
Eske salaiyq, buǵan deiin áleýmettik jelide toida ýaǵyz aitqan er adamnyń videosy taraǵan bolatyn.
Biz musylman bolǵannan keiin shariǵattyń úkimi bolady. Araq degen báleden qutyldyq. Biraq taǵy eki nárse bar: bireýi mýzyka degen báleden qutylýymyz kerek. Ol shariǵatqa túk te sai kelmeidi. Ekinshisi - urǵashylar men erkekter birge otyrýǵa bolmaidy. Sebebi biz Allanyń aldyna baramyz da jaýap beremiz. Al ánshirlerdi shariǵatta shaitannyń azanshysy dep aitady, - deidi videodaǵy er adam.
