Túrkistan oblysynda toi ústinde áielderdi "urǵashylar" dep atap, ánshilerdi "shaitannyń azanshylaryna" teńegen er adamǵa qatysty sotqa deiingi tergeý aiaqtaldy. Qylmystyq is sotqa joldanǵan, dep habarlaidy dalanews.kz inform.kz-ke silteme jasap.
Túrkistan oblysy Politsiia departamentiniń resmi saýalǵa bergen jaýabyna sáikes, Qanaev K.-ǵa qatysty is tergeý bastalǵannan aiaqtalǵanǵa deiin Qylmystyq kodekstiń 174-babynyń 1-bóligi boiynsha qaralǵan. Istiń saralanýy ózgertilmegen jáne oǵan qosymsha baptar engizilmegen.
"Qanaev K.-ǵa qatysty qylmystyq is sotqa deiingi tergeý bastalǵan sátten bastap aiaqtalǵanǵa deiin QR Qylmystyq kodeksiniń 174-baby 1-bóligi boiynsha tergeldi. Qylmystyq quqyq buzýshylyqtyń saralanýy ózgertilgen joq jáne qosymsha bappen tolyqtyrylmady", – dedi Túrkistan oblysy Politsiia departamenti tergeý basqarmasynyń bastyǵy Muhtar Seidildaev.
Kúdiktige eki ai merzimge qamaýda ustaý túrindegi bultartpaý sharasy qoldanylǵan. Keiin qamaý merzimi uzartylmaǵan.
Tergeý barysynda keshendi sot dintaný, saiasattaný jáne psihologiialyq-filologiialyq saraptamasy júrgizilip, onyń qorytyndysy alynǵan. Al 26 tamyzda qylmystyq is sotqa jiberilgen.
"2026 jylǵy 26 tamyzda qylmystyq is Qazaqstan Respýblikasynyń Qylmystyq-protsestik kodeksiniń 190-babynda kózdelgen tártippen sotqa joldandy. Sotqa deiingi tergep-tekserýdiń ózge de málimetteri QR QPK-niń 201-babynyń talaptaryna sáikes jariia etýge jatpaidy", – dedi Muhtar Seidildaev.
Qylmystyq kodekstiń 174-babynyń 1-bóligi áleýmettik, ulttyq, rýlyq, násildik nemese dini alaýyzdyqty qozdyrýǵa baǵyttalǵan qasaqana jariia áreketter úshin jaýapkershilikti qarastyrady. Bul bap boiynsha 2 myńnan 7 myń AEK-ke deiin aiyppul salynýy, eki jyldan jeti jylǵa deiin bas bostandyǵyn shekteý nemese sol merzimge bas bostandyǵynan aiyrý jazasy taǵaiyndalýy múmkin.
2026 jyly bir AEK 4 325 teńgeni quraidy. Demek, aiyppul mólsheri 8 mln 650 myń teńgeden 30 mln 275 myń teńgege deiin jetýi yqtimal. Alaida er adam kináli dep tanylǵan jaǵdaida naqty jazany sot belgileidi.
Eske salaiyq, oqiǵa tamyz aiynyń basynda Túrkistan oblysynyń Jetisai qalasynda ótken toida bolǵan. Áleýmettik jelide taraǵan videoda toi qonaǵy erler men áielder bólek otyrýy kerek ekenin aityp, áielderdi «urǵashylar» dep ataǵan. Sondai-aq ol ánshilerdi «shaitannyń azanshylaryna» teńegen. Video qoǵamda qyzý talqyǵa túsip, keiin politsiia qylmystyq is qozǵady.
Oqiǵaǵa sol kezdegi Memlekettik keńesshi Erlan Qarin de pikir bildirip, Qazaqstannyń zaiyrly memleket ekenin jáne dindi óner men mádenietke qarsy qoiýǵa bolmaitynyn atap ótken. Onyń sózinshe, áielderdi kemsitý, ánshiler men mýzyka ónerine teris kózqaras tanytý ulttyq bolmysqa jat.
Qazaqstan musylmandary dini basqarmasy da málimdeme jasap, islamda ana men áielge qurmet kórsetý talap etiletinin, al adamnyń ar-namysy men qadir-qasietin qorlaýǵa jol berilmeitinin eske salǵan.
