Dúniejúzilik Toǵyzqumalaq Qaýymdastyǵy 9qum.com atty jańa tsifrlyq platformany tanystyrdy. Jasandy intellektpen jattyǵý, onlain týrnirlerge qatysý, partiialardy tereń taldaý jáne álemniń túkpir-túkpirindegi qarsylastarmen oinaý múmkindigin usynatyn joba ulttyq oiyndy halyqaralyq deńgeide damytýǵa jol ashady, dep habarlaidy dalanews.kz.
Jobany toǵyzqumalaqshy ári baǵdarlamashy Eldar Shaimaǵambet pen Esenshoraeva Ádemi birlesip ázirledi.
Bul zamanaýi platforma toǵyzqumalaq áýesqoilary men kásibi sportshylarǵa, jattyqtyrýshylarǵa jáne tóreshilerge arnalǵan keń múmkindikter usynady.
Platformanyń negizgi múmkindikteri:
* Jasandy intellektpen (JI) ártúrli deńgeide oinap, daiyndalý jáne sheberlikti jetildirý;
* Álemniń kez kelgen núktesindegi oiynshylarmen onlain partiia ótkizý;
* Jeke kabinet arqyly jattyqtyrýshymen birlesip jumys isteý, tapsyrmalar oryndaý jáne partiialardy taldaý;
* Qarsylaspen beinebailanys arqyly oiyn ótkizý;
* Ár partiia boiynsha jasandy intellekttiń tolyq taldaýyn alyp, jiberilgen qatelerdi, tiimdi júristerdi jáne balama nusqalardy kórý;
* Kez kelgen debiýttik nemese taktikalyq pozitsiiany taqtaǵa qoiyp, jasandy intellekttiń eń tiimdi júrister jónindegi usynystaryn alý;
* Onlain týrnirlerge qatysý jáne halyqaralyq deńgeidegi jarystardy uiymdastyrý;
* Úzdik oiynshylardyń batldary men partiialaryn tikelei efirde nemese jazba arqyly tamashalap, olardyń oiyn mánerin zerdeleý;
* Toǵyzqumalaqqa arnalǵan oqýlyqtardy, ádistemelik quraldardy jáne ǵylymi eńbekterdi onlain kitap dúkeninen satyp alý.
Platformanyń taǵy bir mańyzdy ereksheligi – onlain týrnirlerdi uiymdastyrýdyń tolyqqandy júiesiniń engizilýi.
Uiymdastyrýshylar qatysýshylardyń tirkelýin, oiyndardyń ótý barysyn jáne nátijelerdiń jańartylýyn onlain rejimde baqylap, jarysty tiimdi basqara alady. Sonymen qatar oiynshylar beinebailanys arqyly bir-birin kórip otyryp oiyn ótkize alady. Bul halyqaralyq deńgeidegi jarystardy ashyq, ádil ári joǵary sapada uiymdastyrýǵa múmkindik beredi.
Qazirgi tańda platformaǵa 1400-ge jýyq sportshy tirkelip, iske qosylǵan alǵashqy úsh kúnniń ishinde 9 myńǵa jýyq partiia oinaldy. Bul jańa platformanyń qysqa merzim ishinde toǵyzqumalaq qaýymdastyǵynyń úlken qyzyǵýshylyǵyna ie bolǵanyn kórsetedi.
Osy ýaqytqa deiin platformada eki onlain týrnir uiymdastyrylyp, oǵan 300-ge jýyq sportshy qatysty. Jeńimpazdar men júldegerler baǵaly syilyqtarmen marapattaldy.
Aldaǵy ýaqytta platformada:
* respýblikalyq jáne halyqaralyq deńgeidegi turaqty týrnirler ótkizý;
* reitingtik júieni jetildirý;
* oqý-jattyǵý múmkindikterin keńeitý;
* jasandy intellekttiń taldaý sapasyn arttyrý;
* toǵyzqumalaqty álemniń túkpir-túkpirine keńinen nasihattaý josparlanyp otyr.
Bul joba – ulttyq ziiatkerlik muramyzdy zamanaýi tsifrlyq tehnologiialarmen ushtastyryp, toǵyzqumalaqtyń halyqaralyq bedelin arttyrýǵa baǵyttalǵan mańyzdy qadam.
Jańa platforma sportshylarǵa sheberligin shyńdaýǵa, jattyqtyrýshylarǵa oqý-jattyǵý úderisin jetildirýge, al jankúierlerge súiikti oiynyn jańa deńgeide tamashalaýǵa múmkindik beredi.
Barshańyzdy https://9qum.com platformasyna tirkelip, onyń barlyq múmkindikterin paidalanýǵa shaqyramyz. Birlese otyryp, toǵyzqumalaqty álemdik deńgeide jańa beleske kótereiik!
