TMD aýmaǵyndaǵy eń iri kriptoservistiń qyzmeti toqtatyldy, dep habarlaidy Dalanews.kz.
Blokchein arqyly kriptotranzaktsiialardy baqylaý barysynda internet alaiaqtyq pen esirtki saýdasynan túsken kiristi jylystatýǵa kásibi qyzmet kórsetken RAKS exchange atty kriptoaiyrbastaý servisi anyqtalǵan. Bul servis qylmystyq ortada joǵary bedelge ie bolǵan jáne 5 mln astam qoldanýshysy bar 20 iri Darknet naryǵymen jumys istegen.
"Sońǵy úsh jyl ishinde bul kriptoservis arqyly TMD elderindegi, sonyń ishinde Qazaqstan, Resei, Ýkraina jáne Moldovada 200-den asa esirtki dúkeniniń zańsyz kirisi aqtalǵan. Kriptoaiyrbastaý platformasynyń jalpy ainalymy 224 mln AQSh dollarynan asqan. Tergeý barysynda 4 000-nan asa kriptovaliýta ámiiany zerttelip, qylmystyq kiris saqtalǵan ámiiandar anyqtaldy", - dep jazylǵan habarlamada.
Nátijesinde serviske tiesili 67 kriptoámiian buǵattalǵan. Jalpy somasy 9,7 mln USDT (5,2 mlrd teńge) bolatyn tsifrlyq aktivter ýaqytsha toqtatylǵan. Búgingi kúni servis tolyqtai óz qyzmetin toqtatqan.
