2025 jyldyń 27-28 naýryz kúnderi Túrkistan qalasynda Bilim mazmunyn damytý institýtynyń uiymdastyrýymen halyqaralyq pedagogikalyq sammit ótti. Jiynnyń basty taqyryby – Júsipbek Aimaýytulynyń pedagogikalyq murasy jáne N.A. Orazahynovanyń «Satylai keshendi oqytý» tehnologiiasynyń jańashyldyǵy boldy, dep habarlaidy Dalanews.kz
Halyqaralyq jiyndy pedagogika ǵylymdarynyń doktory, professor, Resei Jaratylystaný ǵylymdar akademiiasynyń korrespondent-múshesi, QR Kishi ǵylym akademiiasynyń vitse-prezidenti ári «Satylai keshendi oqytý» tehnologiiasynyń negizin qalaýshy Nursha Aljanbaiqyzy Orazahynova ashty. Óz sózinde ol HH ǵasyrdaǵy kórnekti pedagog, psiholog Júsipbek Aimaýytulynyń búgingi bilim júiesindegi róli men mańyzyn atap ótip, dástúrli pedagogika men zamanaýi bilim berý tehnologiialaryn úilestirýdiń múmkindikterine toqtaldy.
Sammit aiasynda 28 naýryz kúni «Tilim meniń – tirligimniń aiǵaǵy» taqyrybynda aýyzsha komandalyq olimpiada ótti. Bul bilim saiysy oqýshylardyń jalpy pánder boiynsha básekelesý qabiletin damytý, daryndy balalardyń ǵylymi-tanymdyq belsendiligin arttyrý jáne ulttyq qundylyqtardy dáripteý maqsatynda uiymdastyryldy. Olimpiada tórt kezeńnen turdy: mektepishilik, oblystyq (qalalyq), respýblikalyq jáne halyqaralyq kezeńder. Olimpiadaǵa elimizdiń ár óńirinen – Almaty, Astana qalalary, Pavlodar, Atyraý, Túrkistan oblystary, sondai-aq Qyrǵyzstan men Mońǵoliiadan 101 oqýshy men 57 jetekshi qatysty.
Qazylar alqasy qatysýshylardyń bilimin baǵalaý barysynda olardyń ǵylymi negizde baiandaý sheberligine, pán mazmunyn ashý qabiletine, teoriialyq materialdy praktikalyq turǵydan taldaý daǵdysyna, qazaq halqynyń klassik aqyndary men jazýshylarynyń shyǵarmalaryn mánerlep oqýyna jáne óz kózqarasyn sheshendikpen jetkize bilýine erekshe nazar aýdardy.
Olimpiada nátijesinde komandalyq jarysta Bas júldeni Mońǵoliiadan kelgen «Atameken» toby men Qyrǵyzstannan kelgen «Ýmtýl» toby jeńip aldy. Birinshi oryndy Astana qalasynyń, ekinshi oryndy Almaty qalasynyń, úshinshi oryndy Túrkistan qalasynyń komandalary ielendi. Sonymen qatar, I dárejeli diplommen – 35 oqýshy, II dárejeli diplommen – 26 oqýshy, III dárejeli diplommen – 23 oqýshy, al gramotamen – 17 oqýshy marapattaldy. Jeńimpazdarǵa marapattaryn Bilim mazmunyn damytý institýtynyń direktory Raqymberdi Jetibai tabystady.
Raqymberdi Jetibai sóz kezeginde jeńimpazdar men qatysýshylardy quttyqtap, is-sharanyń mańyzdylyǵyna toqtaldy: «Bul olimpiada – bilim men ulttyq qundylyqtardyń toǵysatyn alańy. Oqýshylar tek bilim jarysyna qatysyp qana qoimai, óz mádenieti men dástúrin qurmetteýdi, ony tereń túsinýdi úirenedi. Mundai mańyzdy is-sharalar jas urpaqtyń sanaly, jan-jaqty ári bilimdi bolyp qalyptasýyna zor yqpal etedi».
Halyqaralyq sammit dástúrli pedagogika men innovatsiialyq bilim berý tehnologiialaryn biriktirýge arnalǵan mańyzdy alań boldy. Oqýshylardyń ǵylymi-tanymdyq belsendiligin arttyryp, ulttyq qundylyqtardy dáriptegen bul is-shara bilim salasyna tyń serpin berdi.
