Advokat Ainara Aidarhanova baspasóz máslihatynda Áigerim Tileýjanovaǵa qozǵalǵan qylmystyq is týraly aitty, - dep habarlaidy Dalanews.kz.
Byltyr 11 shildede Almatyda qańtar oqiǵasynda Almaty áýejaiyn basyp alý isi boiynsha sottalýshylarǵa úkim jariialanǵan edi. Aiyptalýshylar tarapynda tórt er adam men bir áiel boldy.
Sonyń ishinde Áigerim Tileýjanova QR Qylmystyq kodeksiniń 272-baby 1-bóligi "Kúsh qoldanýmen, qiratýmen, órteýmen, buzýmen, múlikti joiýmen, atys qarýyn, jarylǵysh zattardy nemese jarylys qurylǵylaryn qoldanýmen, sondai-aq, bilik ókiline qarýly qarsylyq kórsetýmen ulasqan, onyń ishinde sheteldik kózderden alynǵan qarajatty paidalana otyryp jappai tártipsizdikti uiymdastyrý" boiynsha kináli dep tanyldy. Ol 4 jylǵa bas bostandyǵynan aiyrý jazasyna kesilip, ortasha rejimdegi koloniiada óteitin boldy. Áigerim Tileýjanova sot zalynda qamaýǵa alynǵan bolatyn.
5 naýryzda oǵan qatysty taǵy bir is qozǵalǵany belgili boldy. Al advokattyń málimdemesi RESPUBLIKA.KZ.media Telegram-arnasynda jariialandy.
"Sot-meditsinalyq saraptama taǵaiyndaldy. Búgin jábirlenýshiler, kúdiktiler jáne basqa da adamdardyń densaýlyǵyna keltirilgen ziiannyń aýyrlyq dárejesin anyqtaý úshin saraptamalyq zertteý ádistemesine sáikes úzindi, anyqtama nemese basqa da anyqtalmaǵan qujattar negizinde qorytyndy jasaýǵa tyiym salynatyny týraly taǵy da jaýap alyndy. Almaty oblysy boiynsha ǵylymi-zertteý institýty direktorynyń sot-meditsinalyq máseleler jónindegi orynbasary bul ótinishke sáikes sot-meditsinalyq saraptama taǵaiyndaý týraly qaýlyny oryndamai qaitarýy kerek dep esepteidi. Óitkeni ótinish berýshiniń ózi tikelei saraptamadan ótýden bas tartady.
Osyǵan orai jaýapqa súiene otyryp, qylmystyq qýdalaý organynda Tileýjanovanyń densaýlyǵyna aýyrlyǵy ortasha ziian túrindegi dene jaraqatyn keltirgeni týraly jetkilikti dáleldemeler men málimetter bolmaǵandyqtan, bul qylmystyq is toqtatylýy tiis", - dedi Aidarhanova baspasóz máslihatynda.
Advokat is nelikten toqtatylýy kerek ekenin de túsindirdi.
"Sottalǵan Bekmojinovanyń ózi, qaitalap aitamyn, kez kelgen saraptamadan bas tartady. Qazirgi ýaqytta tergeýshi sarapshy, sottalǵan Bekmojinovanyń ózin osy ótinishpen tanystyrýy ǵana qaldy jáne bul isti toqtatý kerek dep esepteimiz. Munda eshqandai negiz nemese quram joq. Eger aryzdanýshy Tileýjanova Áigerimdi uryp-soqqan dep eseptese, ony saraptama arqyly rastaýy kerek. Alaida onyń tarapynan bas tartý týraly aryz tústi", - dep túsindirdi Aidarhanova.
Aita keteiik, buǵan deiin Almatyda belsendiler Memleket basshysy Qasym-Jomart Toqaevtan saiasi tutqyndardy bosatýdy talap etip, baspasóz máslihatyn ótkizdi.
Jiynǵa Rysbek Sársenbaiuly, Marjan Aspandiiarova, Ainara Aidarhanova, Jalǵas Saparhanova jáne Dýman Muhammedkárimniń ákesi Almas Tilepov qatysqan.
Rysbek Sársenbaiuly Qazaqstandaǵy saiasi tutqyndar boiynsha Qasym-Jomart Toqaevqa úndeý joldady.
"Eshbir ózgermesten, odan ári keri ketken Nazarbaevtyq bilik júiesi myńdaǵan adamdy baqytsyzdyqqa ushyratty. Solardyń qatarynda júrgendikten, ainalamyzdaǵy ádiletsizdikterden túńilgen soń osy úndeý hatty joldap otyrmyz. ...Aqiqatty ashyq aitqandar biliktiń jaýy atanyp, 37-jyldardaǵydai qýǵyn-súrginge tústi.
Solardyń birnesheýine toqtalyp, aita keteiik: Áigerim Tileýjanova, Qalas Nurpeiisov, Nurlan Dálibaev (t.b.) negizsiz qylmystyq jaýapkershilikke tartylyp, árqaisy 8 jylǵa sottaldy.
...Prezident myrza, óz halqyńyzdy jaý sanamańyz, asyraý silteýge jol bermeńiz. Belsendilerdi ańdý, sottaý toqtatylsyn! Qazaqstanda saiasi tutqyndar bolmasyn!" - dedi Rysbek Sársenbaiuly.
