AQSh-tyń Chevron kompaniiasy Qazaqstan biligimen "Teńiz" ken orny boiynsha kelisimsharttyń bolashaǵyn talqylaýǵa kiristi. Qoldanystaǵy kelisim 2033 jyly aiaqtalady, al aldaǵy jeti jyl taraptar úshin sheshýshi kezeń sanalady, dep habarlaidy Dalanews.kz.
"Teńiz" Qazaqstan ekonomikasyndaǵy strategiialyq nysandardyń biri. Ol eldiń jalpy ishki óniminiń shamamen 10 paiyzyn qalyptastyryp, táýligine million barrelge jýyq munai óndirýge úles qosady. Qarapaiym tilmen aitqanda, ekonomikadaǵy árbir onynshy teńge Teńizben tikelei nemese janama bailanysty.
Chevron bul jobada ondaǵan jyl boiy jumys istep keledi. Osy ýaqyt ishinde kompaniia Teńizdi keńeitýge shamamen 48 mlrd dollar investitsiia salǵan. Bul bastapqy jospardan 11 mlrd dollarǵa artyq. Joba álemdegi eń qymbat ári aýqymdy munai bastamalarynyń birine ainaldy. Qazir taraptar kelesi kezeńniń sharttaryn talqylap jatyr.
Kelissózderdiń dál qazir bastalýyna birneshe faktor áser etti. Birinshiden, qazaqstandyq munai eksportynyń osal tustary aiqyn kórine bastady. Negizgi kólem ótetin Kaspii qubyr konsortsiýmy baǵyty arqyly tasymal Resei aýmaǵyna táýeldi, al Novorossiisk terminalyna jasalǵan dron shabýyldary táýekeldi kúsheitti.
Ekinshiden, Qazaqstan OPEK+ aiasynda óndirý kvotalaryn saqtaý máselesinde qysymǵa jii ushyrap otyr. Eldi limitten asyp ketti dep aiyptaityn pikirler kúsheigen.
Sarapshylardyń aitýynsha, Chevron jobadan ketse, ony almastyrý ońai bolmaidy. Áńgime tek qarjyda emes, basqarý tájiribesi, tehnologiia jáne adam resýrstary týraly. Munda tutas salanyń tiimdiligi tarazyǵa túsedi.
Chevron basshylyǵy bolsa, Teńiz áli de áleýetin tolyq ashqan joq dep sanaidy. Kompaniia dereginshe, óndiris ósip keledi, qýattar keńeitilgen, al infraqurylym ken ornynyń erekshelikterine beiimdelgen.
AQSh Energetikalyq aqparat basqarmasynyń baǵalaýynsha, Qazaqstandaǵy munai qory shamamen 30 mlrd barreldi quraidy. Bul álemdik rekord emes, alaida Kaspii óńirindegi eldi negizgi oiynshylar qataryna qosatyn aitarlyqtai kólem.
Salystyrý úshin, munai qory eń kóp elder qatarynda Venesýela 303 mlrd barrelmen kósh bastaidy. Odan keiin Saýd Arabiiasy, Iran, Kanada jáne Irak tur.
Sarapshylardyń pikirinshe, Teńiz boiynsha kelissózder tek bir ken ornynyń emes, jalpy qazaqstandyq munai sektorynyń bolashaǵyn aiqyndaidy.
