"27 qarashada Resei prezidenti Vladimir Pýtin Astanaǵa ushyp keldi. Áýejaidan ony Qazaqstan prezidenti Qasym-Jomart Toqaev jyly qarsy aldy. Tek "Kommersanttyń" arnaiy tilshisi Andrei Kolesnikov Resei prezidentiniń bul memlekettik sapary Máskeýde rýbl ońbai quldyrap jatqanda bolǵanyna nazar aýdartady". Osylai dep bastalatyn maqalasynda reseilik jýrnalist rýbl taǵdyryna alańdap, kúni keshe prezidentter arasynda ótken kelissózder barysynda ózin mazalaǵan suraqqa jaýap izdeýmen bolady. Eń qyzyǵy, ol sol delegatsiiamen birge Astanada júr eken, dep jazady Dalanews.kz.
Reportaj ári essege tán reseilik "Kommersant" basylymynyń tilshisi Andrei Kolesnikovtyń maqalasyn sol kúiinde aýdaryp berýdi jón kórip otyrmyz.
"...Shaǵyn quramdaǵy kelissózder aldymen shartty túrde, rasynda azshylyqta boldy: Syrtqy ister ministri Sergei Lavrovtan basqa, ol arada vitse-premer Aleksandr Novak, Ekonomikalyq damý ministri Maksim Reshetnikov, kólik ministri Roman Starovoit, Resei temir joldarynyń basshysy Oleg Belozerov júrdi… Olardyń barlyǵy baspaldaqpen ary-beri úshinshi qabatqa júgirýmen boldy (jedelsaty tek prezidentterdiń enshisine buiyrǵan sekildi), bárinen buryn Resei prezidentiniń kómekshisi Iýrii Ýshakov ózin jaily sezindi, ol kelissóz aldynda da, sodan keiin de syrtqa shyǵyp temeki shegip, jýrnalistermen de sóilesip úlgerdi. Odan jýrnalister AQSh prezidentiniń inaýgýratsiiasyna kim baratynyn surady.
- Sheteldik delegatsiialardy shaqyrý qarastyrylmaǵan, elshilerden basqasy, - dedi Iýrii Ýshakov iyǵyn qiqań etkizip sózin ary qarai bylai jalǵastyrdy:
- Al eger Máskeýden Amerika Qurama Shtattary prezidentiniń inaýgýratsiiasyna baryp jatqandar bolsa, olar, shyn máninde, inaýgýratsiianyń ózine emes, onyń ainalasynda ótkiziletin túrli is-sharalarǵa barady. Bal degen sekildi... Al, bylai inaýgýratsiianyń ózine bizden kimde kimniń arnaiy barýy ekitalai. Pal Palych Borodin bir ret AQSh prezidentiniń inaýgýratsiiasyna bardy emes pe (kishi Djordj Býshtyń), ózderińiz biletindei, ol basqa jerden bir-aq shyqqan (keiin Kreml bólmelerine jóndeý jumystary oqiǵasynan soń tergeý izoliatoryna toǵytyldy - A. K.).
Al ol kezde myna jaqta ótip jatqan shaǵyn quramdaǵy, dálirek aitsaq, júzbe júz kelissózder uzaqqa sozyldy, kórshi bólmede Resei delegatsiiasynyń músheleri óz kezegin nemese tipti taǵdyry sheshiletindei taǵatsyzdana kútýmen boldy.
Osy urymtal sátti paidalanyp, men VTB basshysy Andrei Kostinge suraq qoia qoidym:
— Búginderi dollar men rýbl arasynda bolyp jatqan qubylys qanshalyqty dramalyq jait (kúrt sekiris boldy, óitkeni osy ýaqytta 1 AQSh dollary 100-den 114 rýblge bir-aq kóterildi- A. K.)?
— Dramalyq deisiz be, iá solai ǵoi, - dedi ol kútpegen jerden menimen kelise ketip. Shynymdy aitsam, biz mundaidy kútken joqpyz. Azdap álsireidi dep boljanǵan, jyldyń aiaǵynda deiin 1 AQSh dollary 100 rýblge deiin, árine, búgingidei emes.
- Al erteń ne bolady dep boljaisyz, - dedim men de suraqty údete.
— Meniń oiymsha, áli de rýbldi keri qaitarýǵa bolady. Meniń oiymsha deimin",— dedi nyǵyrlap.
- Bul arada yqtimaldylyq jaǵdaiy qandai? Dollardyń ósýin jalǵastyryp jatyr delik?
- Ony saitannyń bir sapalaǵy biledi. Al onyń qadamyn dóp basyp, boljaý múmkin emes, - dep VTB basshysy qatesiz boljam jasady.
Saitannyń sapalyǵy degen kim? Kez kelgen bolýy múmkin ǵoi. Osyndai oilar basymda jylt etip úlgergende Andrei Kostin onyń tikelei dollardyń ózi ekenin jetkizdi.
— Biraq dollar 120 rýbl boldy emes pe, - dedi kenetten Andrei Kostin.Áliptiń artyn baǵyp, taǵy da kúte turaiyq, - dedi ol.
Shamasy, 140 bolǵansha shyǵar.
Al bul kezde myna jaqta ózge jýrnalister Kólik jáne densaýlyq saqtaý ministrin qaýmalap, suraqtyń astyna alyp jatty. "Bilet baǵasy endi kóterile me" dep suraǵanda Starovoit myrza ózin jaqsy ustap, qysqa jáne anyq jaýap berdi:
- Joq, olai bolmaidy dep úmittenemin.
Iaǵni, ol baǵa kóterilmeidi dep aitqan joq.
Al Mihail Mýrashko bizdi jaqtyrmai turǵanyn jasyrmady:
— Bárin nemenege surai beresizder?.. Erteń barlyǵy dári-dármek satyp alýǵa lap qoisyn deisińder me?!
Osy kezde birnárse aitqysy kelip, typyrshyp turǵan Energetika ministri Sergei Tsivilevti kórdim. Aqyry ol kómeiine kelgen sózdi aityp tyndy: "Sizder, adam janynyń injenerisizder, óz jaýapkershikterińizdi túsinýlerińiz kerek!", – dedi bes tiyn bolyp.
Adam janynyń injenerleri ony túsingendei keiip tanytty. Eń bastysy, muny jai injenerler túsinse deńiz...".
