Qazan aiynyń basyndaǵy teńgeniń kúrt qunsyzdanýy Ulttyq banktiń aqsha baǵamy saiasatynyń tiimsizdigin aiqyn kórsetti, - deidi Halyk Finance sarapshylary. Olar Ulttyq bank bul jaǵdaida tym baiaý áreket etti, al bergen túsiniktemeleri bolsa, bolǵan jaitty tolyq ashyp kórsete almady degen pikirde, dep habarlaidy Dalanews.kz.
"Máselen, Ulttyq bank teńgeniń quldyraýyna ishki faktor retinde valiýtalarǵa degen suranystyń artýyn atap ótedi... Endi mynany qarańyz, mamyr aiynda da AQSh dollarymen jasalǵan mámileler kólemi rekordtyq deńgeige jetip, 5,1 milliard dollardy quraǵan edi. Sol ýaqytta ulttyq valiýta baǵamy eń tómengi deńgeide bolyp, 442,19 teńgeni quraǵan bolatyn", - deidi sarapshylar.
Sondai-aq sarapshylar Biryńǵai jinaqtaýshy zeinetaqy qorynyń (BJZQ) investportfeli úshin valiýta satyp alý kezinde múddeler qaqtyǵysy oryn alǵanyn atap ótken.
Birinshiden, BJZQ óz salymshylarynyń jinaqtaryn investitsiialaý arqyly paida tapqysy keledi, biraq sol ýaqytta bul shara teńgeniń qunsyzdanýyna áser etýi múmkin. Bul jerde mynandai múddeler qaqtyǵysy týyndaidy: zeinetaqy qory paida tapqysy kelgenimen, bul jalpy ekonomikalyq turaqtylyqqa keri áser etýi múmkin.
Ekinshiden, bul operatsiialardyń ai saiynǵy qubylmalylyǵy joǵary bolǵandyqtan, salymshylarǵa keri áserin tigizedi. Iaǵni, zeinetaqy jinaqtary qunsyzdanyp nemese turaqsyzdyqqa ushyraýy yqtimal.
Halyk Finance sarapshylarynyń pikirinshe, Ulttyq bank qazanda teńgeniń álsireý úrdisi bastalǵan sátte-aq BJZQ úshin valiýta satyp alýdy dereý toqtatýy kerek edi.
Qazaqstan qazirgi jaǵdaida teńge baǵamyn "erkine" jibere almaitynyn eskerý mańyzdy. Sebebi elimizdiń valiýtalyq naryǵynyń aýqymy tym shaǵyn jáne jetkilikti túrde damymaǵan.
Mundai jaǵdaida Ulttyq bank teńgeniń "erkine jiberilgen baǵamyn basqarý" rejimin ustanyp otyrǵanyn resmi túrde moiyndap, naryqqa qatysty turaqty túrde túsinikteme berip otyrýy kerek. Iaǵni, teńgeniń baǵamyna qandai faktorlar áser etetinin, sol faktorlardyń áseri qanshalyqty ekenin halyqty udaiy qulaǵdar etýi tiis. Bul qarjy salasyndaǵy qatysýshylarǵa da, qarapaiym azamattarǵa da aiqyndyq beredi.
Sarapshylardyń pikirinshe, BJZQ qarajatyn teńge baǵamyn retteý úshin paidalanýdy doǵaryp, onyń ornyna Ulttyq banktiń óz rezervterin qoldanýy kerek.
"Bul interventsiialar naqty jáne ashyq erejelerge negizdelgen bolýy tiis. Mundai tásil kóptegen ortalyq bankterde keń taralǵan jáne eń tiimdi ári túsinikti ádis bolyp sanalady. Naryq qatysýshylary úshin bul ashyqtyq pen turaqtylyqty qamtamasyz etedi. Al zeinetaqy qorynyń qarjysy salymshylardyń múddesine sai saqtalýy tiis, al ony valiýta baǵamyn retteýge baǵyttaý ekiushty jaǵdaiǵa alyp keledi", - deidi olar.
Aita ketsek,ótkende Ulttyq ekonomika vitse-ministri Arman Qasenov bir apta boiy qunsyzdanyp jatqan "ulttyq valiýtanyń baǵamy turaqty" dep, synǵa qalyp edi.
