– Memlekettik satyp alýlar men kvazımemlekettik sektordaǵy satyp alýlardyń búkil júıesin qaıta qaraý qajet. Bul týraly jıyn saıyn aıtyp kelemiz. Joldaýda da aıtqan bolatynmyn, – degen Prezıdent sybaılas jemqorlyqty aýyzdyqtaý úshin qabyldanǵan sharalar jaǵdaıdy aıtarlyqtaı ózgerte qoımaǵanyn synǵa aldy.
– Erejelerdiń kóbi formaldy ekeni baıqalyp otyr. Olardyń aýqymdylyǵy adal jetkizýshilerdi úrkitedi. Memlekettik satyp alýlarǵa repýtasıasy durys, tıisti tehnıkalary men bilikti qyzmetkerleri bar, salyqtardy ýaqtyly tóleıtin jetkizýshiler qatysýy kerek. Qazir biz sybaılas jemqorlyqty naqty joıýdyń ornyna búrokratıalyq prosesterdiń júrip jatqanyn kórip otyrmyz.
Jetkizýshini tańdaý rásimderi birneshe aıǵa sozylady. Biraq sodan bolyp jetkiziletin taýardyń nemese kórsetiletin qyzmettiń sapasy artyp, satyp alý prosesi adal arnaǵa túsip jatqan joq. Barlyq normatıvtik súzgilerge qaramastan, belgili bir tenderdi kim jeńetini aldyn ala belgili bolyp otyrady, – degen Memleket basshysy «Qazavtojol» kompanıasyn mysalǵa keltirdi.
– Eki jyl ishinde tehnıkalyq qadaǵalaý qyzmetterin satyp alý boıynsha 99 konkýrs ótkizdi. Olardyń jartysyn ıesi bir, ataýlary basqa tórt kompanıa jeńip alǵan, – dedi Qasym-Jomart Toqaev.
