– مەملەكەتتىك ساتىپ الۋلار مەن كۆازيمەملەكەتتىك سەكتورداعى ساتىپ الۋلاردىڭ بۇكىل جۇيەسىن قايتا قاراۋ قاجەت. بۇل تۋرالى جيىن سايىن ايتىپ كەلەمىز. جولداۋدا دا ايتقان بولاتىنمىن، – دەگەن پرەزيدەنت سىبايلاس جەمقورلىقتى اۋىزدىقتاۋ ءۇشىن قابىلدانعان شارالار جاعدايدى ايتارلىقتاي وزگەرتە قويماعانىن سىنعا الدى.
– ەرەجەلەردىڭ كوبى فورمالدى ەكەنى بايقالىپ وتىر. ولاردىڭ اۋقىمدىلىعى ادال جەتكىزۋشىلەردى ۇركىتەدى. مەملەكەتتىك ساتىپ الۋلارعا رەپۋتاسياسى دۇرىس، ءتيىستى تەحنيكالارى مەن بىلىكتى قىزمەتكەرلەرى بار، سالىقتاردى ۋاقتىلى تولەيتىن جەتكىزۋشىلەر قاتىسۋى كەرەك. ءقازىر ءبىز سىبايلاس جەمقورلىقتى ناقتى جويۋدىڭ ورنىنا بيۋروكراتيالىق پروسەستەردىڭ ءجۇرىپ جاتقانىن كورىپ وتىرمىز.
جەتكىزۋشىنى تاڭداۋ راسىمدەرى بىرنەشە ايعا سوزىلادى. ءبىراق سودان بولىپ جەتكىزىلەتىن تاۋاردىڭ نەمەسە كورسەتىلەتىن قىزمەتتىڭ ساپاسى ارتىپ، ساتىپ الۋ پروسەسى ادال ارناعا ءتۇسىپ جاتقان جوق. بارلىق نورماتيۆتىك سۇزگىلەرگە قاراماستان، بەلگىلى ءبىر تەندەردى كىم جەڭەتىنى الدىن الا بەلگىلى بولىپ وتىرادى، – دەگەن مەملەكەت باسشىسى «قازاۆتوجول» كومپانياسىن مىسالعا كەلتىردى.
– ەكى جىل ىشىندە تەحنيكالىق قاداعالاۋ قىزمەتتەرىن ساتىپ الۋ بويىنشا 99 كونكۋرس وتكىزدى. ولاردىڭ جارتىسىن يەسى ءبىر، اتاۋلارى باسقا ءتورت كومپانيا جەڭىپ العان، – دەدى قاسىم-جومارت توقايەۆ.
