Qytailyq Temu marketpleisi Polshada jeńildikterdi kórsetý tásiline bailanysty aiyppulǵa tartyldy. Endi onlain-platforma el biligine 1,7 million dollar tóleýi tiis, dep habarlaidy Dalanews.kz.
Iri kólemdegi aiyppuldy Polshanyń Básekelestikti jáne tutynýshylardyń quqyqtaryn qorǵaý basqarmasy — UOKiK saldy. El zańnamasyna sáikes, satýshy sońǵy 30 kún ishindegi taýardyń eń tómengi baǵasyn kórsetýge mindetti. Bul tutynýshyǵa jeńildiktiń shynaiy mólsherin jáne usynystyń qanshalyqty tiimdi ekenin baǵalaýǵa múmkindik beredi. Temu osy talapty buzyp, bir ai ishindegi eń tómen baǵa týraly aqparatty kórsetpegen.
Sonymen qatar, platforma baǵa dempingi, jeńildikterdi oiyn elementteri arqyly usyný jáne «Milliarder siiaqty satyp al» uranymen tanymal. Mysaly, marketpleis qymbat sanattaǵy taýarlardy, sonyń ishinde PlayStation nemese Nintendo konsolderin 990 teńgeden de arzan baǵada usynatyndai kórinedi. Alaida mundai baǵa tek naqty bir ýaqyt aralyǵynda jáne óte shekteýli danamen ǵana qoljetimdi bolady. Jeńildikti «ustap qalýǵa» tyrysqan qoldanýshylarǵa osy aralyqta kóp mólsherde jarnama men marketingtik ailalar kórsetilip, qajetsiz taýarlarǵa aqsha jumsaýǵa itermeleidi. Sondyqtan Playstation syndy qymbat qurylǵyny Temu -den 990 teńgege satyp alý yqtimaldyǵy is júzinde nólge teń. Mundai shemalardyń qalai jumys isteitini týraly qoldanýshylar áleýmettik jelilerde jii jazady.
Aita ketý kerek, keibir qazaqstandyq infliýenserler áli de osy marketpleisti jarnamalaidy. Olardyń aitýynsha, Temu-den tańdalǵan taýarlardy belgili bir sharttardy oryndasa, tegin alýǵa bolady. Alaida áleýmettik jeli qoldanýshylary mundai «tegin» taýar alý úshin ondaǵan adamdy qosymshaǵa tirkelýge kóndirý qajet ekenin aitady. Qurylymy jaǵynan bul tásil jelilik marketingke, tipti qarjylyq piramidaǵa uqsaidy.
Temu-diń marketingtik ádisteri alaiaqtyq ailalarǵa uqsaitynyn qazaqstandyqtar burynnan baiqaǵan. Mysaly, Reddit forýmynda shamadan tys jarnama, eń úzdik smartfondardy nan men súttiń baǵasyndai aqshaǵa satý týraly habarlandyrýlar jáne marketpleistegi taýar sapasynyń óte tómendigi jii talqylanǵan.
Buǵan qosa, qazaqstandyq BAQ Qytai marketpleisteri qoldanýshylardy táýeldilikke itermeleýi múmkin ekenin jazǵan. Keri sanaq taimerleri, referaldyq júieler jáne oiyn formatyndaǵy jeńildikter adamdardy úzdiksiz shyǵyn jasaý men derekter almasý tsikline engizedi. Sonyń saldarynan keibir qoldanýshylar arzan syilyq nemese kúmándi jeńildik alý úshin 2–3 táýlikke deiin ýaqytyn jumsap, ondaǵan myń teńge shyǵyndaýy múmkin.
Sarapshylardyń pikirinshe, mundai tásilder dofamin bólinýin yntalandyryp, platformany qumar oiyndar, áleýmettik jeliler jáne beineoiyndar siiaqty táýeldilik týdyratyn ortaǵa ainaldyrady. Al jalpy mehanikasy men minez-qulyqqa áser etý joldary oiyn avtomattarynyń printsipine uqsaidy.
