Búgin, 9 sáýirde Almatynyń Naýryzbai aýdandyq sotynda "Alaýyzdyq qozdyrdy" dep aiyptalǵan Qaznews24 satiralyq pabliginiń avtory Temirlan Eńsebektiń isi boiynsha sot protsesi jalǵasty, dep habarlaidy Dalanews.kz
Temirlan Eńsebektiń ákesi Marat Turǵymbai sotta qazaq tilinde sóiledi, sýdia sot óndirisi orys tilinde júrgizilip jatqanyn aityp, oryssha sóileýdi ótindi.
"Qoǵamdyq qorǵaýshy, siz jańa sotty júrgizý tili jaily máseleni kóterdińiz. Osy oraida ulyńyz, iaǵni sottalýshy Temirlan Eńsebek ózi sotty júrgizý tili retinde orys tilin tańdaǵanyn esińizge salamyn. Siz sottalýshynyń ókili retinde bul týraly bilesiz", - dedi sýdia.
Alaida Marat Turǵymbai bul týraly bilmegenin aitty. Buǵan deiingi Almaly aýdandyq sotynda qazaqsha sóilegenin jetkizdi.
"Orys tilin tańdaǵan biz emes, sizdiń balańyz. Biraq siz soǵan qaramastan jurttyń aldynda ádeii suraq qoiyp, protsedýrany buzyp otyrsyz. Men ana tildi bilemin, jetik meńgergenmin, sotty qazaqsha júrgizeiik deseńiz, júrgizeiik. Biraq sottalýshy Temirlan Eńsebek erteń "sot nege orys tilinde júrmedi" dep daý shyǵarmas úshin dál osy jerde zańda belgilengen tártipke sáikes sot tilin aýystyrý týraly ótinishin aitsyn. Til týraly máseleni ýshyqtyrýdyń qajeti joq ekenin eskertemin. Zań bárine ortaq. Maǵan sottyń qai tilde ótkeni báribir. Tildi tańdaǵan sizdiń balańyz. Sot óndirisiniń tilin buzýǵa bolmaidy. Sotty aralas júrgizýge bolmaidy. Sizderdiń advokattaryńyz bar, olar zańdy biledi, eger men zań buzýshylyqqa jol berip otyrsam, advokatyńyz sizge túsindiredi",- dedi sýdia.
Eske salaiyq, qylmystyq kodekstiń "Arazdyq qozdyrý" baby boiynsha aiyp taǵylǵan Temirlan Eńsebek sot protsesine Almatynyń tergeý abaqtysynan videobailanys arqyly qosyldy. Qorǵaý jaǵy Eńsebekti sot zalyna ákelýdi surady. Temirlan Eńsebek bailanys óte nashar ekenin aitty. Biraq prokýror qarsy shyqty. Sot qorǵaý jaǵynyń ótinishin qabyldaǵan joq. Otyrysty "gibridtik rejimde" jalǵastyrýdy buiyrdy.
