بۇگىن، 9 ساۋىردە الماتىنىڭ ناۋرىزباي اۋداندىق سوتىندا "الاۋىزدىق قوزدىردى" دەپ ايىپتالعان Qaznews24 ساتيرالىق پابليگىنىڭ اۆتورى تەمىرلان ەڭسەبەكتىڭ ءىسى بويىنشا سوت پروسەسى جالعاستى، دەپ حابارلايدى Dalanews.kz
تەمىرلان ەڭسەبەكتىڭ اكەسى مارات تۇرعىمباي سوتتا قازاق تىلىندە سويلەدى، سۋديا سوت ءوندىرىسى ورىس تىلىندە جۇرگىزىلىپ جاتقانىن ايتىپ، ورىسشا سويلەۋدى ءوتىندى.
"قوعامدىق قورعاۋشى، ءسىز جاڭا سوتتى جۇرگىزۋ ءتىلى جايلى ماسەلەنى كوتەردىڭىز. وسى ورايدا ۇلىڭىز، ياعني سوتتالۋشى تەمىرلان ەڭسەبەك ءوزى سوتتى جۇرگىزۋ ءتىلى رەتىندە ورىس ءتىلىن تاڭداعانىن ەسىڭىزگە سالامىن. ءسىز سوتتالۋشىنىڭ وكىلى رەتىندە بۇل تۋرالى بىلەسىز"، - دەدى سۋديا.
الايدا مارات تۇرعىمباي بۇل تۋرالى بىلمەگەنىن ايتتى. بۇعان دەيىنگى المالى اۋداندىق سوتىندا قازاقشا سويلەگەنىن جەتكىزدى.
"ورىس ءتىلىن تاڭداعان ءبىز ەمەس، ءسىزدىڭ بالاڭىز. ءبىراق ءسىز سوعان قاراماستان جۇرتتىڭ الدىندا ادەيى سۇراق قويىپ، پروسەدۋرانى بۇزىپ وتىرسىز. مەن انا ءتىلدى بىلەمىن، جەتىك مەڭگەرگەنمىن، سوتتى قازاقشا جۇرگىزەيىك دەسەڭىز، جۇرگىزەيىك. ءبىراق سوتتالۋشى تەمىرلان ەڭسەبەك ەرتەڭ "سوت نەگە ورىس تىلىندە جۇرمەدى" دەپ داۋ شىعارماس ءۇشىن ءدال وسى جەردە زاڭدا بەلگىلەنگەن تارتىپكە سايكەس سوت ءتىلىن اۋىستىرۋ تۋرالى ءوتىنىشىن ايتسىن. ءتىل تۋرالى ماسەلەنى ۋشىقتىرۋدىڭ قاجەتى جوق ەكەنىن ەسكەرتەمىن. زاڭ بارىنە ورتاق. ماعان سوتتىڭ قاي تىلدە وتكەنى ءبارىبىر. ءتىلدى تاڭداعان ءسىزدىڭ بالاڭىز. سوت ءوندىرىسىنىڭ ءتىلىن بۇزۋعا بولمايدى. سوتتى ارالاس جۇرگىزۋگە بولمايدى. سىزدەردىڭ ادۆوكاتتارىڭىز بار، ولار زاڭدى بىلەدى، ەگەر مەن زاڭ بۇزۋشىلىققا جول بەرىپ وتىرسام، ادۆوكاتىڭىز سىزگە تۇسىندىرەدى"،- دەدى سۋديا.
ەسكە سالايىق، قىلمىستىق كودەكستىڭ "ارازدىق قوزدىرۋ" بابى بويىنشا ايىپ تاعىلعان تەمىرلان ەڭسەبەك سوت پروسەسىنە الماتىنىڭ تەرگەۋ اباقتىسىنان ۆيدەوبايلانىس ارقىلى قوسىلدى. قورعاۋ جاعى ەڭسەبەكتى سوت زالىنا اكەلۋدى سۇرادى. تەمىرلان ەڭسەبەك بايلانىس وتە ناشار ەكەنىن ايتتى. ءبىراق پروكۋرور قارسى شىقتى. سوت قورعاۋ جاعىنىڭ ءوتىنىشىن قابىلداعان جوق. وتىرىستى "گيبريدتىك رەجيمدە" جالعاستىرۋدى بۇيىردى.
