Qostanaida 15 jastaǵy jasóspirimniń temirjolǵa shyǵyp, poiyzdy shuǵyl toqtatýǵa májbúr etken áreketi sotta qaralyp, jaýapkershilik onyń anasyna júkteldi, dep habarlaidy Dala News.
Oqiǵa 9 qańtarda bolǵan. Bir top jasóspirim «qyzyq úshin» Qostanai – Almaty baǵytymen kele jatqan poiyzdyń jolyna shyqqan. Mashinist apattyń aldyn alý úshin shuǵyl tejeý qoldanýǵa májbúr boldy. Sot málimetinshe, bul áreket qozǵalys qaýipsizdigine naqty qaýip tóndirip, aýyr saldarǵa, tipti poiyzdyń relsten shyǵýyna deiin alyp kelýi múmkin edi.
Is barysynda sot balanyń anasy ata-analyq mindetin tiisti deńgeide oryndamaǵan degen qorytyndyǵa keldi. Úkimde onyń ulyna qaýipsiz júris-turys erejelerin úiretpegeni jáne jaýapkershilik pen tártipke baýlymaǵany kórsetilgen.
Nátijesinde áielge 43 250 teńge kóleminde ákimshilik aiyppul salyndy. Al osy qaýipti áreketke qatysqan ózge balalardyń ata-analaryna qandai shara qoldanylǵany ázirge habarlanǵan joq.
