Májilis depýtaty Murat Ábenov Telegram messendjerinde Qazaqstan azamattarynyń jeke derekterin esh qiyndyqsyz jariialaityn bottyń paida bolǵanyn málimdedi, dep habarlaidy Dalanews.kz.
Onyń aitýynsha, bul bot memlekettik aqparattyq júielerden alynǵan JSN, mekenjai, bailanys nómiri jáne otbasy músheleri týraly tolyq málimetti kez kelgen adamǵa taratyp otyr.
Depýtat bul jaǵdaidy azamattardyń quqyǵyn buzýmen qatar, ulttyq múddeni satý dep baǵalaidy. Onyń pikirinshe, tsifrlandyrý úderisin biznes múddesine sai beibereket júrgizip jatqan sheneýnikter — qoǵamǵa qaýip tóndirýde. Ábenov bul bot Telegram jelisinde paida bolǵanyn, ony Pavel Dýrov basqaratyn platformada taratyp jatqanyn jáne joba Reseiden basqarylyp otyrǵanyn joqqa shyǵarmaidy. Sebebi ondaǵy derekter arasynda reseilik azamattarǵa qatysty málimetter de kezdesedi.
Májilismenniń aitýynsha, bul júieden qazirgi jáne burynǵy tsifrlyq damý ministrleri — Baǵdat Mýsin men Jaslan Madievtiń de jeke aqparaty tabylǵan. Olardyń eGov-ta tirkelgen nómirleri men otbasyna qatysty derekter bot bazasynan shyqqan. Eger derekterdiń ras-ótirigin teksergisi kelse, ministrler ózderi botty júktep, jeke málimetterin qarap kórsin dep keńes berdi.
Ábenov bul derekqorda azamattardyń JSN-i, qazirgi jáne burynǵy mekenjailary (tipti 15-20 jyl burynǵysy da), tirkelgen kólikteri men balalarynyń telefon nómirleri syndy aqparattyń ashyq turǵanyn aitty. Tanystary bul málimetterdi tekserip, báriniń dál kelgenin rastaǵan. Eger ministrlerdiń ózi qorǵalmaǵan bolsa, qarapaiym azamattardyń málimetteriniń qoldy bolyp jatqanyn elestetý de qorqynyshty, deidi depýtat.
Ol bul derekterdiń sońǵy jańartylýy 2024 jyldyń jeltoqsanynda bolǵanyn atap ótti. Bul – derekterge áli de qoljetimdilik baryn jáne olardy syrtqa satyp otyrǵan satqyndar ministrlik ishinde júrgenin bildiredi dep sanaidy. Mundai bazalar arqyly alaiaqtar azamattarǵa habarlasyp, týystaryn qorqytady, mekenjailaryn anyqtap, olardy ańdýǵa múmkindik alady. Osylaisha, málimet taratýshylar qylmysqa tikelei qatysy bar tulǵalarǵa ainalyp otyr.
Ábenov Ishki ister ministrligi men Bas prokýratýraǵa júginip, bul máselege shuǵyl túrde shara qoldanýdy talap etti. Telegram-daǵy bottyń naqty siltemesin jariia etpegenimen, qajet bolǵan jaǵdaida ony memlekettik organdarǵa usynýǵa daiyn ekenin jetkizdi.
