ءماجىلىس دەپۋتاتى مۇرات ابەنوۆ Telegram مەسسەندجەرىندە قازاقستان ازاماتتارىنىڭ جەكە دەرەكتەرىن ەش قيىندىقسىز جاريالايتىن بوتتىڭ پايدا بولعانىن مالىمدەدى، دەپ حابارلايدى Dalanews.kz.

ونىڭ ايتۋىنشا، بۇل بوت مەملەكەتتىك اقپاراتتىق جۇيەلەردەن الىنعان جسن، مەكەنجاي، بايلانىس ءنومىرى جانە وتباسى مۇشەلەرى تۋرالى تولىق مالىمەتتى كەز كەلگەن ادامعا تاراتىپ وتىر.

دەپۋتات بۇل جاعدايدى ازاماتتاردىڭ قۇقىعىن بۇزۋمەن قاتار، ۇلتتىق مۇددەنى ساتۋ دەپ باعالايدى. ونىڭ پىكىرىنشە، سيفرلاندىرۋ ۇدەرىسىن بيزنەس مۇددەسىنە ساي بەيبەرەكەت جۇرگىزىپ جاتقان شەنەۋنىكتەر — قوعامعا ءقاۋىپ توندىرۋدە. ابەنوۆ بۇل بوت Telegram جەلىسىندە پايدا بولعانىن، ونى پاۆەل دۋروۆ باسقاراتىن پلاتفورمادا تاراتىپ جاتقانىن جانە جوبا رەسەيدەن باسقارىلىپ وتىرعانىن جوققا شىعارمايدى. سەبەبى ونداعى دەرەكتەر اراسىندا رەسەيلىك ازاماتتارعا قاتىستى مالىمەتتەر دە كەزدەسەدى.

ماجىلىسمەننىڭ ايتۋىنشا، بۇل جۇيەدەن قازىرگى جانە بۇرىنعى سيفرلىق دامۋ مينيسترلەرى — باعدات مۋسين مەن جاسلان مادييەۆتىڭ دە جەكە اقپاراتى تابىلعان. ولاردىڭ eGov-تا تىركەلگەن نومىرلەرى مەن وتباسىنا قاتىستى دەرەكتەر بوت بازاسىنان شىققان. ەگەر دەرەكتەردىڭ راس-وتىرىگىن تەكسەرگىسى كەلسە، مينيسترلەر وزدەرى بوتتى جۇكتەپ، جەكە مالىمەتتەرىن قاراپ كورسىن دەپ كەڭەس بەردى.

ابەنوۆ بۇل دەرەكقوردا ازاماتتاردىڭ ءجسن-ى، قازىرگى جانە بۇرىنعى مەكەنجايلارى (ءتىپتى 15-20 جىل بۇرىنعىسى دا)، تىركەلگەن كولىكتەرى مەن بالالارىنىڭ تەلەفون نومىرلەرى سىندى اقپاراتتىڭ اشىق تۇرعانىن ايتتى. تانىستارى بۇل مالىمەتتەردى تەكسەرىپ، ءبارىنىڭ ءدال كەلگەنىن راستاعان. ەگەر مينيسترلەردىڭ ءوزى قورعالماعان بولسا، قاراپايىم ازاماتتاردىڭ مالىمەتتەرىنىڭ قولدى بولىپ جاتقانىن ەلەستەتۋ دە قورقىنىشتى، دەيدى دەپۋتات.

ول بۇل دەرەكتەردىڭ سوڭعى جاڭارتىلۋى 2024 جىلدىڭ جەلتوقسانىندا بولعانىن اتاپ ءوتتى. بۇل – دەرەكتەرگە ءالى دە قولجەتىمدىلىك بارىن جانە ولاردى سىرتقا ساتىپ وتىرعان ساتقىندار مينيسترلىك ىشىندە جۇرگەنىن بىلدىرەدى دەپ سانايدى. مۇنداي بازالار ارقىلى الاياقتار ازاماتتارعا حابارلاسىپ، تۋىستارىن قورقىتادى، مەكەنجايلارىن انىقتاپ، ولاردى اڭدۋعا مۇمكىندىك الادى. وسىلايشا، مالىمەت تاراتۋشىلار قىلمىسقا تىكەلەي قاتىسى بار تۇلعالارعا اينالىپ وتىر.

ابەنوۆ ىشكى ىستەر مينيسترلىگى مەن باس پروكۋراتۋراعا جۇگىنىپ، بۇل ماسەلەگە شۇعىل تۇردە شارا قولدانۋدى تالاپ ەتتى. Telegram-داعى بوتتىڭ ناقتى سىلتەمەسىن جاريا ەتپەگەنىمەن، قاجەت بولعان جاعدايدا ونى مەملەكەتتىك ورگاندارعا ۇسىنۋعا دايىن ەكەنىن جەتكىزدى.