Astanada «Senimen Bolashaq» respýblikalyq qoǵamdyq birlestiginiń bes jyldyǵyna orai uiymdastyrylǵan «Tektiler tý kóteredi» atty BAQ ókilderi arasyndaǵy respýblikalyq baiqaýdyń jeńimpazdaryn marapattaý rásimi ótti, dep habarlaidy dalanews.kz.
Is-sharaǵa elimizdiń 14 óńirinen kelgen jýrnalister qatysyp, úzdik jumystardyń avtorlary arnaiy marapattarǵa ie boldy.
Jiynda sóz sóilegen «Senimen Bolashaq» respýblikalyq qoǵamdyq birlestiginiń tóraǵasy Nurken Asanov uiymnyń bes jyl ishinde atqarǵan jumystary týraly baiandady.
«Bizder, “Senimen Bolashaq” azamattyq qoǵam ókilderi retinde negizgi mindetti halyqqa, qoǵamǵa qyzmet etý dep bilemiz. Al BAQ ókilderiniń de mindeti – aqparat keńistigindegi aǵartýshylyq arqyly eldik múddege qyzmet etý. Iaǵni, bárimizdiń ielengenimiz – bir teriniń pushpaǵy», – dedi «Senimen Bolashaq» RQB quryltaishysy Nurken Asanov.
Onyń aitýynsha, osy ýaqyt aralyǵynda birlestik Qazaqstannyń 16 óńirinde jumys júrgizip, 350 myńnan astam ata-anany jáne azamattyq qoǵam ókilderin qamtyǵan. Uiym 17 435 is-shara, 57 forým, 5 simpoziým, 3767 seminar-trening, 300-den astam túrli baǵyttaǵy baiqaý jáne 20 áleýmettik jobany júzege asyrǵan.
Nurken Asanov jýrnalistikanyń qoǵamdaǵy aǵartýshylyq róline toqtalyp, aqparat quraldarynyń ulttyq qundylyqtardy dáripteý men qoǵamdyq sanany qalyptastyrýdaǵy mańyzyn atap ótti.
Sondai-aq aldaǵy ýaqytta BAQ ókilderine arnalǵan osyndai baiqaýlar men konkýrstar keń kólemde jalǵasatynyn jetkizdi.
Baiqaýǵa Qazaqstannyń barlyq óńirinen 50-ge jýyq baspa, internet-basylym, radio jáne telearna jýrnalisteri qatysty. Qatysýshylar ulttyq tárbie, qoǵamdyq sana, ortaq jaýapkershilik, rýhani mura jáne azamattyq ustanym taqyryptaryndaǵy materialdaryn usyndy.
Qazylar alqasynyń sheshimimen tórt negizgi nominatsiia boiynsha jeńimpazdar anyqtaldy. «Baspa basylymyndaǵy úzdik maqala» nominatsiiasynda Ekibastuz qalalyq «Otarqa» gazetiniń bas redaktory Janargúl Qadyrova jeńimpaz atansa, «Internet-basylymdaǵy úzdik jariialanym» nominatsiiasynda Baq.kz aqparat agenttiginiń tilshisi Maqpal Jumashova úzdik dep tanyldy.
«Aǵartýshylyq demekshi, jýrnalistika mamandyǵynyń ózi de aǵartýshylyq dárejesinde. Sondyqtan aqparatty taldap, qoǵamǵa durys jetkizý – úlken jaýapkershilik», – dedi Nurken Asanov.
Al «Respýblikalyq baspa basylymyndaǵy úzdik maqala» nominatsiiasy «Egemen Qazaqstan» gazetiniń tilshisi Sándibek Prenovke buiyrsa, «Úzdik radio nemese YouTube baǵdarlamasy» atalymynda QAZAQ RADIOLARY quramyndaǵy «Shalqar» ulttyq radiosynyń jýrnalisi Gúlnur Omarhanqyzy jeńiske jetti.
Sonymen qatar Qamshy.kz, Ertis telearnasy, Qyzylorda telearnasy, «Munara» gazeti, Qaz365.kz, «Jambyl-Taraz» gazeti, «Ortalyq Qazaqstan» gazeti, Kazinform halyqaralyq aqparat agenttigi, Dauletten.kz aqparattyq saity, Prezident teleradiokesheniniń JIBEK JOLY radiosy jáne Pavlodar oblystyq Halyq radiosynyń ókilderine arnaiy júldeler tabystaldy.
