Sonyń barysynda COVID-19-dyń emdeý hattamasyne engen dári-dármektiń mol qory tabyldy. Agenttik qyzmetkerlerimen ilese kelgen qoǵam ókilderi "munshama dárini medmekemelerge nelikten der kezinde taratpaǵan?" degen zańdy saýal qoidy.
Koronavirýspen kúreste Qazaqstanǵa baǵyttalyp jatqan gýmanitarlyq kómek aldymen "SK-Farmatsiiaǵa" aialaidy. Júkti qabyldaý men onyń tasymalyna osy kompaniia jaýap beredi. Dári-dármekti óńirlerge jóneltý Densaýlyq saqtaý ministrligimen kelisimimen júzege asady. Olardy ári qarai taratý jergilikti densaýlyq saqtaý basqarmasyna júkteledi.
"SK-Farmatsiia" jumysyndaǵy kemshilikterdi anyqtaý jumysyna qoǵam ókilderi de atsalysýda.
Ázir jemqorlyqqa qarsy qyzmet Katardan jetken gýmanitarlyq kómektiń Pavlodar oblystyq aýrýhanasyna jetkizilý protsesi qanshalyqty zańdy bolǵanyn anyqtaýda.
Agenttiktiń Shymkenttegi ókilderi Qytaidan kelgen kómektiń óńirlik medmekemelerge tiisti deńgeide jetýin baqylaýǵa alǵan.
Sonymen qatar Aqtóbe oblysyna Qytai men Reseiden jetken gýmanitarlyq kómektiń (onyń ishinde meditsinalyq kózildirik, meditsinalyq qorǵanys quraldary, hirýrgiialyq qolǵap, termometr jáne taǵy basqasy bar, red.) tiisti oryndarǵa jedel jetýine de jemqorlyqqa qarsy agenttik mamandary baqylaýda ustaýda.
Kúni keshe Mańǵystaý óńirine Arab Ámirliginen virýstan qorǵaityn zattar jetkizildi. Olar da qatań baqylaýǵa alynyp, aimaqtaǵy medoryndarǵa jetkiziledi.
10 shilde Úkimettiń keńeitilgen otyrysynda prezident Toqaev "SK-Farmatsiia" jáne Saqtandyrý qorynyń jumysyn synǵa alyp, olardyń qyzmetin tergeýge alýdy tapsyrǵan. Artynsha "SK-Farmatsiia" basshysy Berik Shárip ornynan alynǵan. Jemqorlyqqa qarsy qyzmet mekemedegi korrýtsiia belgilerin anyqtaý maqsatynda tergeýdi bastap ketti. Ol 31 shildege deiin jalǵasady.
