Almatyda «Taza Qazaqstan» respýblikalyq baǵdarlamasy aiasynda GREEN UP ekologiialyq jobasy bastaldy. Bastamanyń tanystyrylymy 31 tamyzda qaladaǵy №224 mektepte ótti. Joba ECO Network qatysýymen, qalanyń Ekologiia jáne qorshaǵan orta basqarmasy men Eco Almaty qoldaýymen júzege asyrylyp otyr, dep habarlaidy dalanews.kz.
GREEN UP jobasy oqýshylar men olardyń otbasylarynda qaldyqty bólek jinaý, jaýapty tutyný jáne tabiǵi resýrstarǵa uqypty qaraý sekildi ekologiialyq ádetterdi qalyptastyrýǵa baǵyttalǵan.
Alǵashqy pilottyq joba Bostandyq aýdanynda qolǵa alynǵan. Green APP Almaty baǵdarlamasy aiasynda aýdandaǵy balabaqshalar, mektepter men kolledjderdi biriktirý josparlanǵan. Markov kóshesi, 44 mekenjaiyndaǵy jáne Satbayev University-degi Eko-habtar, sondai-aq econetwork.me tsifrlyq platformasy bastamanyń negizine ainaldy.
Qatysýshylar qaitalama shikizatty úide jinap, Eko-habtarǵa tapsyra alady. Nátije mobildi qosymshada tirkelip, bilim berý uiymdarynyń jalpy reitinginde eskeriledi. Sondai-aq, ekologiialyq aktsiialar men eriktilik is-sharalarǵa qatysqany úshin upai jinaýǵa bolady.
№224 mekteptiń direktory Raiza Ahmetova ekologiialyq ádetterdi erte jastan qalyptastyrýdyń mańyzyn atap ótti.
«Bizdiń maqsatymyz – oqýshylardyń ekologiialyq mádenietin qalyptastyryp, qorshaǵan ortaǵa jaýapkershilikpen qaraýdy kúndelikti ádetke ainaldyrý. Balanyń tabiǵatty qorǵaý qajettigin bilip qana qoimai, óziniń is-áreketi arqyly ony saqtaýǵa naqty úles qosa alatynyn túsinýi mańyzdy», – dedi Raiza Ahmetova.
Tanystyrylym barysynda oqýshylarǵa qaldyqty qalai durys suryptaý kerektigi jáne qandai materialdardyń qaita óńdeýge qabyldanatyny kórsetildi. Oqýshylar makýlatýra men plastik qaldyqtaryn da ákelip, qaita óńdeýge tapsyrdy.
Joba avtory Evgenii Muhamedjanov ekologiialyq ádet tájiribe jáne búkil otbasynyń atsalysýy arqyly tiimdi qalyptasatynyn jetkizdi.
«Ekologiialyq mádeniet adamnyń kúndelikti qarapaiym áreketinen bastalady. Eger bala úide qaldyqty suryptap, olardy qaita óńdeýge tapsyrsa, ýaqyt óte kele bul iske búkil otbasy qosylady. Bizdiń mindetimiz – ekologiialyq jaýapty áreketti túsinikti, qoljetimdi ári qyzyqty etý», – dedi Evgenii Muhamedjanov.
Aldaǵy ýaqytta qatysýshylar ekologiialyq klýbtar quryp, bastamalaryn usynyp, qala tabiǵatyn qorǵaý aktsiialaryna qatysa alady. Sondai-aq, mektep oqýshylaryna, kolledj stýdentterine, ata-analar men bilim berý uiymdarynyń qyzmetkerlerine arnalǵan eriktilik baǵdarlama qarastyrylǵan.
Jobada yntalandyrý tetigi de qarastyrylǵan. Belsendi qatysýshylar men bilim berý uiymdary jáne qaitalama shikizattyń belgili bir túrlerin jinaǵany úshin marapattalady. Bolashaqta bul úlgini Almatynyń basqa aýdandaryna da engizý josparlanyp otyr.
GREEN UP ekologiialyq aǵartýdy, tsifrlyq quraldar men naqty is-áreketterdi ushtastyra otyryp, qaldyqtarǵa jaýapkershilikpen qaraýdy kúndelikti ómirdiń bir bóligine ainaldyrýdy kózdeidi.
