Almatyda qaýipsizdikke qaýip tóndiretin apatty aǵashtardy kesý jalǵasýda, dep habarlaıdy Dalanews.kz.
Almatyda "Taza Qazaqstan" respýblıkalyq baǵdarlamasy aıasynda kógaldandyrý jáne ekologıalyq jaǵdaıdy jaqsartý boıynsha jumystar qyzý júrgizilip jatyr.
Qalada 4 mıllıonǵa jýyq aǵash ósedi, biraq olardyń edáýir bóligi jańartýdy qajet etedi: 485 myń aǵash qýraǵan, al 84 myńy apatty jaǵdaıda dep sanalady. Bul aǵashtar negizinen qalanyń ortalyq bóliginde shoǵyrlanǵan jáne turǵyndar men qorshaǵan ortaǵa qaýip tóndiredi.
Qaýipsizdikti qamtamasyz etý jáne jasyl qordy jaqsartý maqsatynda apatty jaǵdaıdaǵy aǵashtardy kesýdiń besjyldyq jospary ázirlendi (2022 jyly jasalǵan), oǵan sáıkes kesiletin aǵashtardyń kólemi birtindep kóbeıedi. Mysaly, 2022 jyly Almaty qalasynda 6,7 myń aǵash kesildi, al 2023-2025 jyldary jyl saıyn 17 myń aǵashty kesý josparlanǵan. 2026 jyly apatty jaǵdaıdaǵy 27 myń aǵashty kesý josparlanyp otyr.
Jasyl qordyń tepe-teńdigin saqtaý maqsatynda kesilgen aǵashtardyń ornyna on ese kóp tal otyrǵyzylady. Bıyl 173 myń aǵash otyrǵyzý josparlansa, 2026 jylǵa qaraı bul kórsetkish 270 myńǵa jetpek.
Sondaı-aq, aýdandyq ákimdikter aǵashtardy sanıtarlyq maqsatta kesip jatyr. Bul sharalar qalanyń estetıkalyq ári ekologıalyq sapasyn arttyryp qana qoımaı, qaýipsizdikti qamtamasyz etýde jáne turǵyndarǵa qolaıly jaǵdaı jasaýda mańyzdy ról atqarady.
Eske salaıyq, Qala kúni qarsańynda Almatyda Tazalyq aptalyǵy ótip jatyr. 9-13 qyrkúıek aralyǵynda "Almaty – bizdiń ortaq úıimiz" qalalyq naýqany men respýblıkalyq "Taza Qazaqstan" baǵdarlamasy aıasynda kóshelerdi, aýlalardy, sýburqaqtardy, ózen jaǵalaýyn, saıabaqtar men skverlerdi, sondaı-aq taý bókterin tazalaý boıynsha aýqymdy jumystar jalǵasyp otyr.
Qala kúnin merekeleýge arnalǵan is-sharalar almaty.kz saıtynda, sondaı-aq ákimdiktiń Instagram paraqshasynda, Almaty mádenıet basqarmasy men aýdandyq ákimdikterdiń resmı paraqshalarynda jarıalanǵan. Eskerteıik, azdaǵan ózgerister bolýy múmkin. Aqparatty ákimdiktiń resmı ınternet-resýrstary arqyly baqylap otyrýdy suraımyz.
Aıta ketý kerek, Almaty ekonomıkasy turaqty ósý ústinde. Jarty jylda 715 mlrd teńge ınvestısıa tartyldy. Jyl basynan beri 32 myńnan astam jańa jumys orny quryldy. Almatynyń JÓÓ 2024 jyly 4,7% - ǵa ósti. Almatyda negizgi kapıtalǵa salynǵan ınvestısıalar kólemi 15,8% - ǵa ulǵaıdy. Jyl basynan beri Almaty Business Development Company qalanyń bıznesin damytý boıynsha 14 myńnan astam konsýltasıa ótkizdi, 208 ruqsat qujattaryn alýǵa kómek kórsetildi, 112 bıznes-jospar ázirlendi, 1,5 mlrd teńgege 37 jobany qarjylandyrýǵa yqpal etildi. «Almaty Business Development Company» Almaty qalasynyń bıznesti damytý kompanıasy» JSHS Almaty qalasynda ınvestısıalar tartý jáne ınvestorlarǵa yqpal etý salasyndaǵy óńirlik uıym bolyp tabylady.
