Taiaý Shyǵystaǵy ahýalǵa bailanysty shamamen 5 myń qazaqstandyqty evakýatsiialaý josparlanyp otyr. Bul týraly Úkimettegi brifingte Syrtqy ister ministriniń orynbasary Álibek Baqaev málimdedi, dep habarlaidy Dalanews.kz.
Onyń aitýynsha, elge qaitarylýy múmkin azamattardyń jalpy sany shamamen 5 myń adamdy quraidy, alaida bul kórsetkish ózgerýi múmkin.
"Búgin alǵashqy evakýatsiialyq FlyDubai reisi ushty. Sonymen qatar Dýbaidan bizdiń azamattar otyrǵan avtobýstardyń alǵashqy legi jolǵa shyqty. Kún sońyna deiin Sultan Omannan Qazaqstanǵa 467 azamatty jetkizýdi josparlap otyrmyz", - dedi Bakaev.
SIM ókiliniń málimetinshe, Birikken Arab Ámirlikteri áýe keńistigin japqandyqtan, kóptegen áýe kompaniialary reisterdi keiinge shegerdi. Degenmen óz tasymaldaýshylaryna jolaýshylar aldyndaǵy mindettemelerin oryndaýǵa ruqsat berilgen.
"Keshegi reis FlyDubai kompaniiasynyń sheshimimen júzege asty. Ol buryn bilet satyp alǵan, biraq 28 aqpan, 1 jáne 2 naýryz kúnderi usha almaǵan Qazaqstan azamattaryna arnaldy", - dep túsindirdi vitse-ministr.
Sondai-aq Syrtqy ister ministrliginiń dereginshe, qazir birqatar qazaqstandyq tranzit aimaqtarynda biletsiz qalyp otyr. Budan bólek, Birikken Arab Ámirlikteri men Katar aýmaǵynda turyp jatqan azamattar da bar.
