Táýelsizdiktiń 30 jyldyǵyna orai jetisýlyqtarǵa memlekettik nagradalar tabystaldy
Elimizdiń eń ulyq merekesi - Táýelsizdiktiń 30 jyldyǵyna arnalǵan saltanatty jiyn Taldyqorǵandaǵy B.Rimova atyndaǵy drama teatrynda ótti. Jetisý jurtshylyǵymen kezdesýde Máýlen Áshimbaev Qazaqstannyń táýelsiz memleket retinde qalyptasýynyń negizgi kezeńderine jáne elimizdiń 30 jylda qol jetkizgen tabystaryna toqtaldy. Senat Spikeri osy jyldar ishinde elimiz shekarany shegendep, jańa ekonomikalyq júiege kóship jáne ony nyǵaityp, memlekettik institýttardyń berik negizin qalaǵanyn aitty.
«Tuńǵysh Prezident – Elbasy Nursultan Ábishuly Nazarbaevtyń tarihi sheshimimen Arqa tórine jańa elordamyzdy turǵyzdyq. Astanany salý tutas eldiń ekonomikasyna mýltiplikativti áserin tigizdi. Qazirgi tańda Nur- Sultan qalasy barlyq sala men óńirge qan júgirtken elimizdiń naǵyz júregine ainaldy», – dedi Senat Tóraǵasy.
Máýlen Áshimbaev Táýelsizdik alǵaly Almaty oblysynyń ósip- órkendegenin jáne osy kezeńde óńir turǵyndarynyń turmystyq jaǵdaiy artqanyn tilge tiek etti. Aimaqta iri kásiporyndar boi kóterip, myńdaǵan jumys orny ashylǵanyna nazar aýdardy.
Sondai-aq Senat Tóraǵasy Prezident Qasym-Jomart Toqaevtyń elimizdi jańǵyrtý baǵdary Qazaqstannyń damýyna tyń serpin bergenin jáne sonyń aiasynda saiasi, áleýmettik reformalardy iske asyrýǵa jol ashylǵanyn jetkizdi.
«Saiasi básekeniń nyǵaiýyna yqpal etken mańyzdy sheshimder qabyldandy. Áleýmettik salany damytýǵa aitarlyqtai nazar aýdaryldy. Muǵalimderdiń, meditsina, mádeniet qyzmetkerleriniń jalaqysy edáýir ulǵaidy. Ustazdardyń mártebesi ósti. Múgedekterdi qoldaý baǵytyndaǵy zańnamalyq baza nyǵaia tústi. Ekonomikany ártaraptandyrý isi jańa qarqynmen jalǵasyn tapty», - dedi Máýlen Áshimbaev.
Saltanatqa jinalǵan kópshilikti Almaty oblysynyń ákimi Qanat Bozymbaev ta quttyqtap, táýelsizdiktiń el damýyndaǵy mán-mańyzyna toqtaldy:
– Biyl barsha qazaqstandyqtar táýelsizdigimizdiń 30 jyldyǵyn atap ótýde. Eldigimizdiń altyn arqaýy, birligimizdiń berik bastaýy bolǵan osy mereili merekemen sizderdi shyn júrekten quttyqtaimyn! Óz Táýelsizdigin jariialaǵan Qazaqstan Tuńǵysh Prezidentimiz Nursultan Ábishuly Nazarbaevtyń batyl bastamasymen jáne ólsheýsiz eńbegimen jańa da jasampaz dáýirge qadam basty. Osy jyldar ishinde ǵasyrǵa bergisiz múmkindikterge jol ashyldy, aýqymdy jumystar atqaryldy. Elbasynyń saliqaly saiasatymen iske asyrylǵan ulan-ǵaiyr isterdi qazir Prezidentimiz Qasym-Jomart Kemeluly Toqaev jalǵastyryp keledi.
Tarihqa taǵzym etý, tulǵalardy taný, eldikti qurmetteý, táýelsizdikti odan ári nyǵaitý – bárimizge artylǵan úlken mindet, búgingi urpaqtyń perzenttik paryzy. Bul rette qarapaiym azamattardyń memleket damýyna qosqan úlesi zor. Olar eldiń erteńine sendi, kúndiz-túni tynymsyz eńbek etti, tabandylyq tanytty. Bul Táýelsizdigimizdiń nyǵaiýyna óz septigin tigizdi, – dedi Qanat Bozymbaev. Osy oraida oblys basshysy óńirdiń áleýmettik-ekonomikalyq damýyna, qoǵamdyq ómirine belsene aralasqan birqatar azamattardyń esimin qurmetpen atap ótti. Sol siiaqty táýelsizdik jyldarynda Almaty oblysynyń jetken jetistikterine de toqtaldy. Máselen, halyqtyń turmys sapasyn jaqsartýdyń arqasynda táýelsizdik jyldarynda óńirde 548 myń jumys orny ashylyp, jumyssyzdyq deńgeii 1999 jyldaǵy 14,2%-ten 2021 jyly 4,8%-ke tómendedi. 15 mln. sharshy metrden astam turǵyn úi, 198 mektep, 1 myńnan astam balabaqsha, 32 sport nysany, 153 meditsinalyq mekeme, 7 farmatsevtikalyq zaýyt iske qosyldy. Osyndai jumystardyń nátijesinde halyqtyń ortasha ómir súrý uzaqtyǵy 67-den 72 jasqa jetken.
Mundai irgeli isterge memleket qoldaýynyń arqasynda qol
jetkizilgenin aita kele, oblys basshysy táýelsizdikti nyǵaitýdyń birden bir joly tatýlyq pen turaqtylyqty saqtaý, eseli eńbek etý ekenine toqtalyp, jetisýlyqtarǵa tilegin bildirdi:
- Otanymyzdyń Kók týy biikte jelbirep, beibit tańymyz arailap ata bersin! Elimiz aman, zamanymyz tynysh, shyǵar biikterimiz kóp bolsyn! Táýelsizdikti kózdiń qarashyǵyndai saqtap, Máńgilik Eldiń muraty jolynda abyroily eńbek ete bereiik! – dedi Qanat Bozymbaev.
Shara marapattaý rásimimen jalǵasyp, jetisýlyq azamattarǵa M.Áshimbaev pen Q.Aldabergenov memlekettik nagradalar tapsyrdy.
«Parasat», «Qurmet», III dárejeli «Eńbek dańqy» ordenderi, «Shapaǵat» medali, Qazaqstan Respýblikasynyń Qurmet gramotasy jalpy sany 80-ge jýyq adamǵa berildi. Shara patriottyq rýhtaǵy merekelik kontsertpen túiindeldi.
Máýlen Áshimbaev oblysqa sapary aiasynda «Taldyqorǵan» júzý basseinine jáne I.Jansúgirov atyndaǵy Jetisý ýniversitetiniń Stýdentter úiine arnaiy at basyn burdy. Odan bólek, jergilikti Táýelsizdik qurdastarymen kezdesip, egemendiktiń 30 jylynda atqarylǵan jumystyń bári, eń aldymen, óskeleń urpaqty qoldaýǵa baǵyttalǵanyn aitty. Táýelsizdikti kózimizdiń qarashyǵyndai qorǵaý, ony qadirleý jáne nyǵaitý barsha qazaqstandyqtyń eń basty mindeti ekenin, bul rette, ásirese, jastarǵa úlken jaýapkershilik júkteletinin de tilge tiek etti.
«Búgin sizder 2050 jyldyń jastary úshin hat ázirlep otyrsyzdar. Elimiz osy ǵasyrdyń ortasyna qarai álemniń eń damyǵan 30 eliniń qataryna qosylýdy maqsat etip qoidy. Bul hatty sol úlken eldik maqsatymyz oryndalǵan qoǵamnyń jastary oqidy dep senemiz. Al búgingi jas býyn sol jarqyn qoǵamdy qalyptastyrý úshin aianbai eńbek etýi kerek. Jastarymyz bul mindetti abyroimen oryndaidy dep senemiz», – dedi Máýlen Áshimbaev.
