Aqsý aýdanynyń ákimi Esim Bazarhanovtyń aitýynsha, aýdanda Elbasy men Prezidenttiń halyqty qoljetimdi turǵyn úimen qamtý týraly tapsyrmalaryn oryndaýǵa basymdyq berilgen. Bul mindetti júzege asyrýda «Nurly jer» memlekettik baǵdarlamasy úlken múmkindik berdi. Sonyń arqasynda aqsýlyqtar mereke qarsańynda jańa baspanaǵa ie boldy. Úi alǵandar qatarynda halyqtyń áleýmettik áljaýaz toptaryna jatatyn 12 sanattaǵy azamattar bar. Kóp balaly analar, jetim balalar, sol siiaqty apatty úide turatyndar da osy qýanyshtyń ishinde. Qoldanysqa berilgen jalgerlik úilerdi «Nur-Qurylys bolashaq» JShS merdiger uiymy turǵyzdy. Jobanyń jalpy qýaty – 503,9 mln. teńge.
Taǵy bir 60 páterlik turǵyn úi «Nurly jer» baǵdarlamasymen Kóksý aýdanynda salynyp berildi.
«El Táýelsizdiginiń 30 jyldy qutty bolsyn! Búgin, mine, kezekte turǵan 60 azamat «Nurly jer» baǵdarlamasymen salynǵan jańa páterlerge qol jetkizip otyr. Bul Memleket basshysy Qasym-Jomart Kemeluly Toqaevtyń halyqty turǵyn úimen qamtý týraly aldyǵa qoiǵan mindetterin oryndaýdyń bir parasy. Jańa qonystaryńyz qutty bolsyn! Sizderge zor densaýlyq, baq-bereke, shańyraqtaryńyzǵa shattyq tileimin», - dedi Kóksý aýdanynyń ákimi Almas Ádil úi kiltterin tapsyrý saltanatynda. Sol siiaqty aýdanda taǵy 21 jeke turǵyn úidiń jáne 60 páterli úi salý josparlanyp otyrǵanyn aitty.
Osy kúni Qarasai aýdanynda da «Ómirzaq» turǵyn úi kesheninde tanhaýstaǵy 30 jalgerlik páter kóp balaly otbasylaryna berildi. Sondai-aq aýdan ákimi Jandarbek Dalabaev jyl sońyna deiin kezektegi taǵy 50 otbasy baspanaly bolatynyn jetkizdi. Bul qatarda jalgerlik te, nesielik te úiler berilmek.
Sonymen qatar Shamalǵan aýylynda 30 metrlik Tý tuǵyry ornatyldy, birqatar mańyzdy nysandar iske qosyldy. Jandosov aýylynda aýyldyq ákimdik «Open space» formatynda jumys istei bastady. «Samruk Kazyna» qorynyń qatysýymen Áitei aýylynda sporttyń belsendi túrlerimen ainalysýǵa jáne jastardy salamatty ómir saltyna baǵyttaýǵa barlyq jaǵdai jasalǵan kóp salaly sport kesheni salynyp, paidalanýǵa berildi.
