Táýelsizdik – erkin eldiń urany
Elimizdiń Ánuranymen bastaý alǵan saltanatty jiynǵa Keles aýdanynyń ákimi Aqmentai Esbaev, aýdandyq máslihat hatshysy Aryn Totikov bastaǵan aýdan aktivi jáne aýdandyq memlekettik mekeme basshylary, aýdandyq ardagerler keńesi músheleri, sondai-aq aýdan halqy qatysty.
Saltanatty jiyndy ashyp berý, Táýelsizdik kúni merekesimen quttyqtaý jáne marapattaý úshin aýdan ákimi Esbaev Aqmentai Úsenulyna sóz berildi.
– Jeltoqsannan bastaý alǵan táýelsizdik eldiń alys armanyna jetkizdi. Yntymaqty uran, tatýlyqty tý etken beibit halqymyz osy ýaqyt aralyǵynda tolaǵai tabystarǵa jetti. Memleketimizben aýdanymyzdyń qarqyndy damýy turaqty saiasat pen ishki birliktiń arqasy. Elbasymyzdyń sarabdal saiasatynyń, aýylǵa, jastarǵa degen baǵdarlamalarynyń arqasynda qanshama igi ister atqarylýda. Kók bairaǵy jelbiregen, búgingidei abyroily da aibyndy, bedeldi de berekeli, yntymaǵy men birligi jarasqan elimizdiń táýelsizdigi baiandy bolsyn. Táýelsizdigimizdiń tuǵyry biik, egemendigimiz máńgilik bolsyn! Merekelerińiz merekege ulassyn, – dep sózin aiaqtady.
Sondai-aq oblys ákiminiń Qurmet gramotasymen, aýdan ákiminiń alǵys hatymen qoǵamǵa eńbegi sińgen azamattardy marapattady. Kelesi sóz tizginin alǵan aýdandyq máslihat hatshysy Aryn Totikov:
– Táýelsiz memleketimiz, kók týymyz, kartadan oiyp alar ornymyz bar. Bul qýanysh qazaq eli úshin ońai kele salǵan joq. Sondyqtan bizder osyndai táýelsiz elde ómir súrip jatqanymyzǵa qýanyp, talmai eńbek etip, elimizdiń jarqyn bolashaǵy úshin bir el bolyp jumyla jumys atqarýymyz tiis. Merekelerińiz qutty bolsyn, elimizde tek beibitshilik bolsyn, – dep aq tilegin bildirdi. Saltanatty jiyn sońy aýdandyq Mádeniet úiiniń shaǵyn kontsertine ulasty.
Keles aýdany ákiminiń baspasóz qyzmeti
