Qyzdar ýnıversıtetinde el egemendiginiń 25 jyldyǵyna arnalǵan «Táýelsiz – Qazaqstanym» atty merekelik kesh bolyp ótti.

Óner jáne mádenıet fakúlteti, Mádenı-buqaralyq  jumystarynyń teorıasy men ádistemesi kafedrasy  «Mádenı-tynyǵý jumysy» mamandyǵynyń 4-kýrs   stýdenti    Qanatqyzy Raıhannyń uıymdastyrýymen ótken merekelik keshke tanymal estrada juldyzdary, atap aıtqanda, Maqpal Júnisova, Sulýshash Nurmaǵambetova, Erbolat Qudaıbergenov, Beıbit Qushqalıev, Nursultan Qurman, Eset Sádýaqasov, Jasulan Musaǵalı, «Azıa» tobynyń múshesi Nursultan Batyrqulov, «Jigitter» tobynyń solısi Aıdar Baıjanov, «Denar» toby, «Kún álemi» bı toby, Nazarbek, Armanaı jáne t.b. ánshiler qatysyp, elimizdiń eń ulyq merekesi – el táýelsizdiginiń 25 jyldyǵymen barsha qaýymdy quttyqtap,  ánnen shashý shashty. Ár ánshi repertýaryndaǵy tanymal degen 2-3 ánnen oryndap, barsha kórermenderge merekelik kóńil-kúı syılady.

Joǵary deıgeıde ótken keshte elimizdiń basynan ótkergen qıly-qıly qıyn kezeńderi, dáýirlerden dáýirler jalǵasyp, nebir «tar jol, taıǵaq keshýlerdi» bastan ótkergen memleketimizdiń taǵdyr joly sýretteletin beıne fılm kórsetilip, ata-babalarymyz san ǵasyrlar boıy armandap kelgen Táýelsiz memleketimizdiń tabystary men jetistikteri baıandalatyn poezıalyq qoıylym, «Jońǵar shapqynshylyǵy», «Uly otan soǵysy», «Semeı» polıgony, «Jeltoqsan  oqıǵasy», «Táýelsiz Qazaqstan» týraly sahnalyq  kompozısıalar  qoıyldy. Beıne fılm barysynda ár joǵary oqý ornynda bilim alyp, «Bolashaq» baǵdarlamasymen shet elde oqyp kelgen táýelsizdigimizdiń qurdastary bolyp tabylatyn kóptegen jastar óz jetistikterin baıandap, «Onyń barlyǵy Táýelsizdiktiń arqasynda múmkin boldy, biz beıbit zamanda ómir súrip jatqan baqytty urpaqpyz», dep atap ótedi. Fılmde sondaı-aq, táýelsizdiktiń altyn besigi – Almaty men eldigimizdiń   eńsesiniń eren  belgisi bolyp tabylatyn Astana jóninde aıtylyp, 25 jyl ishinde táýelsiz Qazaq elin qalyptastyryp, naryqtyń qıyn ótkelderinen  aman ótkizip, Qazaqstandy dúnıe dıdaryndaǵy eń myqty memleketter tanıtyndaı, syılaıtyndaı deńgeıge jetkizgen QR Tuńǵysh Prezıdenti-Elbasy Nursultan Nazarbaevtyń eren eńbegi baıandalady. Ásem án men kórkem bımen órilgen merekelik keshtiń ajaryn Maqpal Júnisova, Erbolat Qudaıbergenov, Sulýshash Nurmaǵambetova jáne «Denar» tobynyń jigitteri odan ári asha túsip, kópshiliktiń iltıpatyna ıe boldy. Keshtiń ótýine T.Júrgenov atyndaǵy óner akademıasynyń bolashaq ónerpaz jastary men I.S.Konev atyndaǵy Almaty joǵary áskerı ýchılıshesiniń sarbazdary atsalysty. Tamasha kesh sońy ánshi Ásem Qospaǵarovanyń oryndaýyndaǵy «Atameken» ánimen jabyldy.

«Qazaq eli táýelsizdigin alǵannan beri qýatty memleket retinde qalyptasyp, álemniń aldyńǵy qatarly eline aınalý jolynda talaı belesterdi baǵyndyrdy. Tamyry tereńde jatqan tól tarıhymyzdyń jańa betteri ashyldy. Osy qysqa ǵana ýaqyt ishinde ekonomıkalyq jáne áleýmettik mańyzy zor jobalardy qolǵa alyp, álemdik deńgeıdegi is-sharalardyń ótýine uıytqy bola bildik. Táýelsizdigimizdiń 25  jyldyǵynda elimiz kóp jetistikterge qol jetkizdi. Bolashaq mádenı sharalardy uıymdastyrýshy retinde ol jetistikterdi urpaq sanasyna jetkizý, elimizdiń tarıhyn dáripteý – bizdiń paryzymyz. Men bul sharany el táýelsizdiginiń 25 jyldyǵyna arnaımyn», deıdi sharanyń uıymdastyrýshysy Raıhan Qanatqyzy.