«تاۋەلسىز – قازاقستانىم» اتتى مەرەكەلىك كەش ءوتتى

Dalanews 07 جەلت. 2016 03:18 359

قىزدار ۋنيۆەرسيتەتىندە ەل ەگەمەندىگىنىڭ 25 جىلدىعىنا ارنالعان «تاۋەلسىز – قازاقستانىم» اتتى مەرەكەلىك كەش بولىپ ءوتتى.


ونەر جانە مادەنيەت فاكۋلتەتى، مادەني-بۇقارالىق  جۇمىستارىنىڭ تەورياسى مەن ادىستەمەسى كافەدراسى  «مادەني-تىنىعۋ جۇمىسى» ماماندىعىنىڭ 4-كۋرس   ستۋدەنتى    قانات قىزى رايحاننىڭ ۇيىمداستىرۋىمەن وتكەن مەرەكەلىك كەشكە تانىمال ەسترادا جۇلدىزدارى، اتاپ ايتقاندا، ماقپال ءجۇنىسوۆا، سۇلۋشاش نۇرماعامبەتوۆا، ەربولات قۇدايبەرگەنوۆ، بەيبىت قۇشقالييەۆ، نۇرسۇلتان قۇرمان، ەسەت ءسادۋاقاسوۆ، جاسۇلان مۇساعالي، «ازيا» توبىنىڭ مۇشەسى نۇرسۇلتان باتىرقۇلوۆ، «جىگىتتەر» توبىنىڭ ءسوليسى ايدار بايجانوۆ، «دەنار» توبى، «كۇن الەمى» بي توبى، نازاربەك، ارماناي جانە ت.ب. انشىلەر قاتىسىپ، ەلىمىزدىڭ ەڭ ۇلىق مەرەكەسى – ەل تاۋەلسىزدىگىنىڭ 25 جىلدىعىمەن بارشا قاۋىمدى قۇتتىقتاپ،  اننەن شاشۋ شاشتى. ءار ءانشى رەپەرتۋارىنداعى تانىمال دەگەن 2-3 اننەن ورىنداپ، بارشا كورەرمەندەرگە مەرەكەلىك كوڭىل-كۇي سىيلادى.


dalanews-makpal


جوعارى دەيگەيدە وتكەن كەشتە ەلىمىزدىڭ باسىنان وتكەرگەن قيلى-قيلى قيىن كەزەڭدەرى، داۋىرلەردەن داۋىرلەر جالعاسىپ، نەبىر «تار جول، تايعاق كەشۋلەردى» باستان وتكەرگەن مەملەكەتىمىزدىڭ تاعدىر جولى سۋرەتتەلەتىن بەينە فيلم كورسەتىلىپ، اتا-بابالارىمىز سان عاسىرلار بويى ارمانداپ كەلگەن تاۋەلسىز مەملەكەتىمىزدىڭ تابىستارى مەن جەتىستىكتەرى باياندالاتىن پوەزيالىق قويىلىم، «جوڭعار شاپقىنشىلىعى»، «ۇلى وتان سوعىسى»، «سەمەي» پوليگونى، «جەلتوقسان  وقيعاسى»، «تاۋەلسىز قازاقستان» تۋرالى ساحنالىق  كومپوزيسيالار  قويىلدى. بەينە فيلم بارىسىندا ءار جوعارى وقۋ ورنىندا ءبىلىم الىپ، «بولاشاق» باعدارلاماسىمەن شەت ەلدە وقىپ كەلگەن تاۋەلسىزدىگىمىزدىڭ قۇرداستارى بولىپ تابىلاتىن كوپتەگەن جاستار ءوز جەتىستىكتەرىن بايانداپ، «ونىڭ بارلىعى تاۋەلسىزدىكتىڭ ارقاسىندا مۇمكىن بولدى، ءبىز بەيبىت زاماندا ءومىر ءسۇرىپ جاتقان باقىتتى ۇرپاقپىز»، دەپ اتاپ وتەدى. فيلمدە سونداي-اق، تاۋەلسىزدىكتىڭ التىن بەسىگى – الماتى مەن ەلدىگىمىزدىڭ   ەڭسەسىنىڭ ەرەن  بەلگىسى بولىپ تابىلاتىن استانا جونىندە ايتىلىپ، 25 جىل ىشىندە تاۋەلسىز قازاق ەلىن قالىپتاستىرىپ، نارىقتىڭ قيىن وتكەلدەرىنەن  امان وتكىزىپ، قازاقستاندى دۇنيە ديدارىنداعى ەڭ مىقتى مەملەكەتتەر تانيتىنداي، سىيلايتىنداي دەڭگەيگە جەتكىزگەن ق ر تۇڭعىش پرەزيدەنتى-ەلباسى نۇرسۇلتان نازاربايەۆتىڭ ەرەن ەڭبەگى باياندالادى. اسەم ءان مەن كوركەم بيمەن ورىلگەن مەرەكەلىك كەشتىڭ اجارىن ماقپال ءجۇنىسوۆا، ەربولات قۇدايبەرگەنوۆ، سۇلۋشاش نۇرماعامبەتوۆا جانە «دەنار» توبىنىڭ جىگىتتەرى ودان ءارى اشا ءتۇسىپ، كوپشىلىكتىڭ ءىلتيپاتىنا يە بولدى. كەشتىڭ وتۋىنە ت.جۇرگەنوۆ اتىنداعى ونەر اكادەمياسىنىڭ بولاشاق ونەرپاز جاستارى مەن ي.س.كونيەۆ اتىنداعى الماتى جوعارى اسكەري ۋچيليششەسiءنىڭ ساربازدارى اتسالىستى. تاماشا كەش سوڭى ءانشى اسەم قوسپاعاروۆانىڭ ورىنداۋىنداعى «اتامەكەن» انىمەن جابىلدى.


dalanews-zhenpi«قازاق ەلى تاۋەلسىزدىگىن العاننان بەرى قۋاتتى مەملەكەت رەتىندە قالىپتاسىپ، الەمنىڭ الدىڭعى قاتارلى ەلىنە اينالۋ جولىندا تالاي بەلەستەردى باعىندىردى. تامىرى تەرەڭدە جاتقان ءتول تاريحىمىزدىڭ جاڭا بەتتەرى اشىلدى. وسى قىسقا عانا ۋاقىت ىشىندە ەكونوميكالىق جانە الەۋمەتتىك ماڭىزى زور جوبالاردى قولعا الىپ، الەمدىك دەڭگەيدەگى ءىس-شارالاردىڭ وتۋىنە ۇيىتقى بولا بىلدىك. تاۋەلسىزدىگىمىزدىڭ 25  جىلدىعىندا ەلىمىز كوپ جەتىستىكتەرگە قول جەتكىزدى. بولاشاق مادەني شارالاردى ۇيىمداستىرۋشى رەتىندە ول جەتىستىكتەردى ۇرپاق ساناسىنا جەتكىزۋ، ەلىمىزدىڭ تاريحىن دارىپتەۋ – ءبىزدىڭ پارىزىمىز. مەن بۇل شارانى ەل تاۋەلسىزدىگىنىڭ 25 جىلدىعىنا ارنايمىن»، دەيدى شارانىڭ ۇيىمداستىرۋشىسى رايحان قانات قىزى.


«قىزدار ۋنيۆەرسيتەتى»  مەديا ورتالىعى

ۇسىنىلعان
سوڭعى جاڭالىقتار