Jiynda «Ádiletti Qazaqstandy qalyptastyrýdaǵy Jetisý oblystyq Qazaqstan halqy Assambleiasy jumysynyń negizgi baǵyttary» taqyryby talqylandy.
Elimizdegi saiasi jańǵyrýǵa, jalpyulttyq tutastyqty nyǵaitýǵa Assambleianyń qosyp otyrǵan úlesine toqtalǵan oblys ákimi birtutas ult bolyp uiysýǵa atsalysý, otanshyldyqty, ózara syilastyq pen tatýlyqty jan-jaqty dáripteý barshamyzdyń ortaq mindetimiz ári ainymas strategiialyq baǵdarymyz ekenin atap ótti. Bul rette oblystyq QHA-ny «Aimaq halqynyń birligi men ortaq múddelerin biriktiretin bailanystyrýshy býyn, biregei alań» dep atady.
– «Ádiletti Qazaqstannyń ekonomikalyq baǵdary» Joldaýynda Prezident aldymyzǵa birqatar keleli mindetter júktedi. Osy oraida biz ózderińizben birlesip osy aýqymdy mindetterdi óńirde iske asyrýdyń nátijelerin talqylap, aldaǵy is-sharalardyń baǵyt-baǵdaryn aiqyndaityn bolamyz, – dedi Beibit Isabaev.
Kún tártibindegi máselege bailanysty birqatar azamattar sóz aldy. Oblys ákiminiń orynbasary Marlen Kólbaev keler jylǵa usynylatyn Assambleia jumysynyń basym baǵyttaryn baiandap berdi. Sonyń ishinde mádeni-kópshilik sharalardy uiymdastyrýdyń jańa formatyna kóship, shyǵarmashylyq pen kreativti kózqaras tanytý, etnomádeni birlestikterdiń áleýmettik mańyzy bar bastamalaryn granttyq qarjylandyrýǵa aýystyrý, ózge etnos ókilderiniń jastaryn memlekettik qyzmetke, quqyq qorǵaý jáne áskeri qyzmetke jumysqa ornalasýǵa yntalandyrý jáne múmkindikter týǵyzý siiaqty kóptegen bastamalar bar.
Sonymen qatar Qazaqstan halqy Assambleiasynyń múshesi Atsalim Idigov, oblystyq korei etnomádeni ortalyǵynyń tóraǵasy Vladimir Li, QR Prezidentiniń janyndaǵy Memlekettik basqarý akademiiasynyń Jetisý oblysy boiynsha filialynyń direktory Baqyt Zlobin oi-pikirlerin ortaǵa saldy.
Sessiia jumysyn qorytyndylaǵan oblys ákimi memlekettik mekemelerge etnobirlestikter jumysyn jandandyra túsý, memlekettik tildi úiretý isin jańǵyrtý, Taldyqorǵanda «Dostyq alleiasyn» salatyn laiyqty oryn qarastyrý jáne etnos aralyq tatýlyqty nyǵaitýǵa baǵyttalǵan basqa da tapsyrmalar berdi.
