Tarihi jeńis: Qyzylorda Aidos Sultanǵaliǵa qandai qurmet kórsetti?

Qazaqstandyq grek-rim kúresiniń sheberi Aidos Sultanǵali Horvatiianyń Zagreb qalasynda ótken álem chempionatynyń jeńimpazy atandy. Áleýmettik jelide sportshynyń bul jeńisi týǵan jerinde laiyqty baǵasyn ala almai otyrǵany jóninde jazba tarady. Osy synnan keiin óńir ákimdigi sportshyny qalai qarsy alǵandaryn jariialady, dep habarlaidy Dalanews.kz.

Daýdyń basy

Jýrnalist Aqyrys Seiitqazy áleýmettik jelide mynadai jazba jariialady:

"Keshe chempion atanǵan Aidos Sultanǵali ótkende suhbat berdi maǵan. 2022 jyly Serbiiadaǵy álem chempionatynan qolamen oralady ǵoi. Sóitip týǵan jerine barady. Ol jaqtaǵylar qur diplom men statýetka berip, arqasynan qaǵyp shyǵaryp salypty. Aidos balýandarǵa qoldaýdyń, demeýdiń asa mańyzdy ekenin aityp, biraz nalyǵan. Barlyǵy boksshylardan kem qylmai, 100 myń dollar bersin dep jatyr. Biraq kúreste mundai aqsha qaidan? Ol úshin federatsiianyń tizginin bai-baqýatty, balýandardan eshteńe aiamaityn bireý ustaý kerek", - dedi ol.

Aqyrys Seiitqazy osy tusta óńir ákimdigi de únsiz jatqanyn tilge tiek etken.

"Aitaiyn degenim, Nurlybek Nálibaev 2022 jyldyń sáýirinen beri sol óńirdiń ákimi eken. Aidos sol jyly kúzde álem chempionatyndaǵy ekinshi qolasyn aldy. Endi, mine, chempion atanyp otyr. Ókinishtisi sol, oblys ákimdiginiń resmi instagram paraqshasynda Aidostyń jeńisi týraly bir jazba joq (oblystyq ákimdiktiń resmi saity men resmi instagram paraqshasynda Sultanǵali jaily eshbir málimet joq. Keibir sheneýnikter jeke paraqshalarynda qúttyqtaýy múmkin ekenin joqqa shyǵarmaimyn). Aitpaqshy, qyzylordalyq Móldir Jańbyrbai karateden tuńǵysh álem chempiony bolyp oralǵanda osy Nálibaevtar 300 myń teńge bergen eken. Móldir sol aqshaǵa Qyzylordaǵa baryp-qaitatyn bilep alypty. Osyndai sportshylarǵa zar bolyp otyrǵan aimaqtar bar. Al Qyzylorda qolda baryn baǵalai almai otyr", - dedi ol.

Ákimdik qandai syi kórsetti?

Búgin Qyzylorda oblysynyń ákimi Nurlybek Nálibaev grek-rim kúresinen álem chempiony Aidos Sultanǵalimen, jeke bapkeri Ǵabiden Raiymbekpen kezdesken. Aidos Sultanǵali jaqynda Horvatiia astanasy Zagreb qalasynda ótken eresekter arasyndaǵy grek-rim kúresinen álem chempionatynda qazaq sporty tarihyndaǵy teńdesiz jetistikke qol jetkizdi. 

 

Grek-rim kúresinen Álem chempionatynyń altyn medalin elimizge sońǵy ret 1999 jyly Grekiianyń Afiny qalasynda ótken dúbirli dodada Mhitar Manýkian (63 kg) alyp kelgen bolatyn. Araǵa shirek ǵasyr salyp, Aidos Sultanǵali álemdik arenada top jardy.

"Byltyr elimizdiń, óńirimizdiń janashyr azamaty Baqdáýlet Erkinbekulynyń demeýshiligimen kólik tabystalǵan. Budan bólek ai saiyn 1 mln. teńge memlekettik stipendiia beriledi. Bul qoldaý ári qarai jalǵasady. Biz batyrymyzdy árdaiym babynda bolýy úshin qoldap, qorǵaýymyz kerek. Aldaǵy Olimpiada oiyndarynda jeńis tuǵyrynan kórinýine jan-jaqty jaǵdai jasaimyz. Búgingi mereili sátte barsha Syr jurtshylyǵynyń atynan Aidos baýyrymyzǵa jańa kólik pen páter kiltterin, bapkeri Ǵabidenge de jańa páter berý týraly sheshim qabyldadyq", – dedi óńir ákimi.