قازاقستاندىق گرەك-ريم كۇرەسىنىڭ شەبەرى ايدوس سۇلتانعالي حورۆاتيانىڭ زاگرەب قالاسىندا وتكەن الەم چەمپيوناتىنىڭ جەڭىمپازى اتاندى. الەۋمەتتىك جەلىدە سپورتشىنىڭ بۇل جەڭىسى تۋعان جەرىندە لايىقتى باعاسىن الا الماي وتىرعانى جونىندە جازبا تارادى. وسى سىننان كەيىن ءوڭىر اكىمدىگى سپورتشىنى قالاي قارسى العاندارىن جاريالادى، دەپ حابارلايدى Dalanews.kz.
داۋدىڭ باسى
جۋرناليست اقىرىس سەيىتقازى الەۋمەتتىك جەلىدە مىناداي جازبا جاريالادى:
"كەشە چەمپيون اتانعان ايدوس سۇلتانعالي وتكەندە سۇحبات بەردى ماعان. 2022 جىلى سەربياداعى الەم چەمپيوناتىنان قولامەن ورالادى عوي. ءسويتىپ تۋعان جەرىنە بارادى. ول جاقتاعىلار قۇر ديپلوم مەن ستاتۋەتكا بەرىپ، ارقاسىنان قاعىپ شىعارىپ سالىپتى. ايدوس بالۋاندارعا قولداۋدىڭ، دەمەۋدىڭ اسا ماڭىزدى ەكەنىن ايتىپ، ءبىراز نالىعان. بارلىعى بوكسشىلاردان كەم قىلماي، 100 مىڭ دوللار بەرسىن دەپ جاتىر. ءبىراق كۇرەستە مۇنداي اقشا قايدان؟ ول ءۇشىن فەدەراسيانىڭ تىزگىنىن باي-باقۋاتتى، بالۋانداردان ەشتەڭە ايامايتىن بىرەۋ ۇستاۋ كەرەك"، - دەدى ول.
اقىرىس سەيىتقازى وسى تۇستا ءوڭىر اكىمدىگى دە ءۇنسىز جاتقانىن تىلگە تيەك ەتكەن.
"ايتايىن دەگەنىم، نۇرلىبەك نالىبايەۆ 2022 جىلدىڭ ساۋىرىنەن بەرى سول ءوڭىردىڭ اكىمى ەكەن. ايدوس سول جىلى كۇزدە الەم چەمپيوناتىنداعى ەكىنشى قولاسىن الدى. ەندى، مىنە، چەمپيون اتانىپ وتىر. وكىنىشتىسى سول، وبلىس اكىمدىگىنىڭ رەسمي ينستاگرام پاراقشاسىندا ايدوستىڭ جەڭىسى تۋرالى ءبىر جازبا جوق (وبلىستىق اكىمدىكتىڭ رەسمي سايتى مەن رەسمي ينستاگرام پاراقشاسىندا سۇلتانعالي جايلى ەشبىر مالىمەت جوق. كەيبىر شەنەۋنىكتەر جەكە پاراقشالارىندا ءقۇتتىقتاۋى مۇمكىن ەكەنىن جوققا شىعارمايمىن). ايتپاقشى، قىزىلوردالىق ءمولدىر جاڭبىرباي كاراتەدەن تۇڭعىش الەم چەمپيونى بولىپ ورالعاندا وسى نالىبايەۆتار 300 مىڭ تەڭگە بەرگەن ەكەن. ءمولدىر سول اقشاعا قىزىلورداعا بارىپ-قايتاتىن بيلەپ الىپتى. وسىنداي سپورتشىلارعا زار بولىپ وتىرعان ايماقتار بار. ال قىزىلوردا قولدا بارىن باعالاي الماي وتىر"، - دەدى ول.
اكىمدىك قانداي سىي كورسەتتى؟
"بىلتىر ەلىمىزدىڭ، ءوڭىرىمىزدىڭ جاناشىر ازاماتى باقداۋلەت ەركىنبەك ۇلىنىڭ دەمەۋشىلىگىمەن كولىك تابىستالعان. بۇدان بولەك اي سايىن 1 ملن. تەڭگە مەملەكەتتىك ستيپەنديا بەرىلەدى. بۇل قولداۋ ءارى قاراي جالعاسادى. ءبىز باتىرىمىزدى ءاردايىم بابىندا بولۋى ءۇشىن قولداپ، قورعاۋىمىز كەرەك. الداعى وليمپيادا ويىندارىندا جەڭىس تۇعىرىنان كورىنۋىنە جان-جاقتى جاعداي جاسايمىز. بۇگىنگى مەرەيلى ساتتە بارشا سىر جۇرتشىلىعىنىڭ اتىنان ايدوس باۋىرىمىزعا جاڭا كولىك پەن پاتەر كىلتتەرىن، باپكەرى عابيدەنگە دە جاڭا پاتەر بەرۋ تۋرالى شەشىم قابىلدادىق"، – دەدى ءوڭىر اكىمى.
