Chempıonatty Halyqaralyq jáne Qazaqstan shahmat federasıalary uıymdastyrady. Bas seriktes jáne basty demeýshi «Freedom Holding Corp». Shara Mańǵystaý oblysy ákimdiginiń qoldaýymen ótýde.
Chempıonat eki kategorıa boıynsha ótedi: 12 jasqa deıingi jáne 18 jasqa deıingi. 50 elden 300-ge jýyq qatysýshy keledi dep kútilýde. Aqtaýǵa alystan at arytyp, Perý, Madagaskar, San-Tome jáne Prınsıpıden qatysýshylar keledi. Chempıonattyń geografıasy shynymen de áserli: tórt qurlyqtyń mektep oqýshylary óz mektebiniń jáne eliniń namysyn qorǵaýǵa, álem chempıony ataǵy úshin kúresýge jáne álemniń ár túkpirinen jańa dostar tabý úshin Aqtaýǵa aǵylady. Mysaly, týrnırde bar bolǵany 68 myńǵa jýyq adam turatyn Kaıman araldarynyń turǵyndarymen tanysýǵa bolady (salystyrmaly túrde bul tipti Jezqazǵan qalasynyń turǵyndarynyń sanynan da az).
Chempıonatta Qazaqstannyń namysyn 6 qaladan 10 mektep qorǵaıdy:
- IT mektep-lıseıi, Aqtaý q.;
- N.Marabaev atyndaǵy №7 mektep-lıseıi, Aqtaý;
- M.Gandı atyndaǵy №92 mamandandyrylǵan lıseıi, Almaty;
- Respýblıkalyq fızıka-matematıka mektebi, Almaty;
- Almaty qalasy fızıka-matematıka baǵytyndaǵy Nazarbaev Zıatkerlik mektebi;
- №72 mektep-lıseıi, Astana qalasy;
- Respýblıkalyq fızıka-matematıka mektebi, Astana q.;
- Atyraý oblystyq “BİLİM-INNOVASIA” lıseı-ınternaty;
- Daryndy balalarǵa arnalǵan № 8 lıseı-mektebi, Pavlodar q.;
- O.Joldasbekov atyndaǵy №9 IT lıseıi, Shymkent q.
Oqýshylar Chempıonatty asyǵa kútýde, sheteldik qonaqtardy qarsy alýǵa daıyn jáne oıynnyń joǵary deńgeıin kórsetý úshin qyzý daıyndyq ústinde. Komandalardyń tıimdi daıyndyǵy úshin Qazaqstan shahmat federasıasy Chempıonat qarsańynda Býrabaıda oqý-jattyǵý jıynyn uıymdastyrady.
Aldaǵy týrnır shahmatqa degen súıispenshiliktiń qanshalyqty sheksiz bola alatynyn taǵy da dáleldeı túsedi. Buǵan, mysaly, Pavlodar mektebiniń oqýshysy Vadım Derksenniń aıaǵynyń synǵanyna qaramastan, komandasyn qolaısyz jaǵdaıda qaldyrmaý úshin Aqtaýǵa barýǵa bel býǵany dálel bola alady. Al basqa eki oqýshy ózderiniń týǵan kúnderin úılerinen jyraqta, chempıonatta ótkizýge daıyn. Solardyń biri – Shymkent qalasyndaǵy O.Joldasbekov atyndaǵy №9 IT lıseıiniń oqýshysy – Nurıslam Aınaqul. Ekinshisi – Mehıkodan keletin Rıkardo Gael Brıto De La O.
Bul rette, uıymdastyrýshylardyń aıtýy boıynsha, týǵan kún ıeleri men basqa da chempıonat qatysýshylaryna jalyǵýǵa týra kelmeıdi. Týrnırdiń negizgi resmı bóliminen basqa, qonaqtar úshin ekskýrsıalyq jáne oıyn-saýyq baǵdarlamasy daıyndaldy.
Qosymsha:
Saltanatty ashylý rásimi 4 tamyz kúni saǵat 11.00-de Qazaqstan halqy Assambleıasy, Dostyq úıi, 34-shaǵyn aýdan, 9 mekenjaıy boıynsha ótedi. Týrnırdiń ózi «Halyk Arena» sport saraıynda ótedi.
Chempıonattyń resmı saıty: https://wstcc2023.fide.com
