Tarih jasaǵan tulǵa
– Myńjyldyqtar toǵysynda Uly dalanyń júreginde jańa memleket paida boldy. Aty ańyzǵa ainalǵan Alash urpaǵy – qazaq halqy úshin bul joǵalǵan qundylyqtardy jańǵyrtýǵa, ótkenimizdiń úzilgen shejiresin qalpyna keltirýge múmkindik berdi. Álemniń iri memleketteriniń ondyǵyna kiretin, tabiǵi bailyqtary mol jáne arsenalynda Keńes Odaǵynan qalǵan iadrolyq qarýy bar eldiń keń-baitaq keńistiginde osy dańqty missiiany oryndaý óz halqynyń dara uly, memleket negizin qalaýshy, Táýelsiz Qazaqstannyń Tuńǵysh Prezidenti – Elbasy Nursultan Ábishuly Nazarbaevqa arnalǵan taǵdyr boldy, – dep atap ótti Qasym-Jomart Toqaev óz kitabynda.
Dýman Qurmanǵazyuly dáriste kitap týraly óz áserimen bólisip, táýelsizdiktiń alǵashqy jyldaryndaǵy eń qiyn kezeńder týraly áńgimeledi.
«Elimiz jańadan táýelsizdik alǵan 1990 jyldardyń basynda kóptegen halyqaralyq sarapshylar memlekettiń qalyptasý jolyna kedergi bolatyn birqatar faktorlardy atai otyryp, Qazaqstannyń bolashaǵy týraly teris pikirler bildirdi. Ol kezeńde qazaqtardyń memleketqurýshy ult retinde úles salmaǵy 30 paiyzǵa da jetpedi. Qazaqstan azamattary arasyndaǵy ártúrli ult, dini senim, táýeldi jáne álsiz ekonomika, ártúrli qarym-qatynas tili siiaqty faktorlar keri pikir týdyrýǵa sebep boldy», – dedi spiker.
Ult Kóshbasshysy Nursultan Nazarbaevtyń kóregen ári sarabdal saiasatynyń arqasynda elimiz Qazaqstan táýelsizdiginiń qalyptasýyna kedergi bolatyn kóptegen máselelerdi eńserdi. Osylaisha barlyq kórshiles respýblikalarmen aýmaqtyq shekara máseleleri sheshildi. Qazaqstan álemniń kóptegen elderimen dostyq jáne syndarly qarym-qatynas ornatyp, halyqaralyq arenada laiyqty oryn aldy. El ekonomikasy naryq talaptaryna sai damydy. «Baiqońyr» ǵarysh ailaǵy men Resei jáne Qazaqstan Kaspii konsortsiýmy boiynsha jobanyń daýly saýaldary men máselesi retteldi.
Dáriste atap ótilgendei, 1991-2000 jyldar elimizdiń barlyq azamattary úshin eń qiyn kezeń boldy. Qazaqstan Prezidentiniń «Tarih jasaǵan tulǵa» kitabynda keltirilgen táýelsizdik qalyptasýynyń eleýli kezeńderi jaiynda qundy ári mańyzdy derekter oqýlyqtarda kezdese bermeidi. Týyndy el táýelsizdigin nyǵaityp, saqtap qalýy tiis bolashaq urpaq úshin tarihi jaǵynan asa paidaly kitaptardyń birine ainaldy. Qorytyndylai kele, dárisker stýdent jastardyń suraqtaryna jaýap berip, olardy el men jerdi baǵalaityn, týǵan halqynyń patriottary bolýǵa shaqyrdy.
