Taraz qalasynda prokýratýra júrgizgen tekserýler nátijesinde zańsyz iemdenilgen 10-nan astam páter kommýnaldyq menshikke qaitaryldy, dep habarlaidy Dalanews.kz.
Qala prokýratýrasynyń málimetinshe, anyqtalǵan páterlerdiń jalpy naryqtyq quny 100 mln teńgeden asady. Prokýrordyń bastamasymen apelliatsiialyq saty birinshi instantsiia sotynyń sheshimin joiyp, quny 15 mln teńge bolatyn eki bólmeli páterdi memleket menshigine qaitarý týraly jańa qaýly shyǵarǵan.
Tekserý barysynda azamattyń páterdi qala turǵynynan qolhat arqyly alǵany, keiin ony zańdy túrde satyp aldym dep sotqa júgingeni belgili bolǵan. Birinshi satydaǵy sot talapty qanaǵattandyrǵanymen, apelliatsiia kezinde talapkerdiń páterdi satyp alǵanyn jáne onda jeti jyl boiy úzdiksiz turǵanyn rastaityn qujattardy usynbaǵany anyqtaldy.
Sonymen qatar prokýratýra qala ákimdigine qaraýsyz qalǵan jyljymaityn múlik nysandaryna qatysty shara qabyldaý jóninde qadaǵalaý aktisin engizgen. Nátijesinde sot ákimdiktiń talap-aryzdaryn qanaǵattandyryp, eki páter men jer telimi bar bir turǵyn úidi iesiz dep tanyp, kommýnaldyq menshikke bergen. Bul nysandardyń jalpy quny shamamen 30 mln teńgeni quraidy. Taǵy úsh páter boiynsha sot isteri qaralý satysynda.
Budan bólek, tirkeýshi organ taǵy úsh páterdi iesiz múlik retinde esepke aldy.
Prokýratýra ókilderi 2025 jyldyń sáýir aiynda da kommýnaldyq menshikke 10 páter qaitarylǵanyn eske saldy. Ol turǵyn úiler áleýmettik osal toptaǵy, baspanaǵa muqtaj azamattarǵa berilgen.
Qala prokýratýrasy zańsyz alynǵan turǵyn úilerdi memleket menshigine qaitarý jumystary jalǵasatynyn málimdedi.
