Tarazda mektep qabyrǵasynda soqqyǵa jyǵylyp, bir kózinen aiyrylǵan jasóspirimniń ata-anasy istiń ádil ári jan-jaqty tergelýin talap etip otyr. Otbasy janjalǵa qatysqan barlyq adamnyń áreketine quqyqtyq baǵa berilýi kerek dep sanaidy, dep dalanews.kz tilshisi "Vremia" basylymyna silteme jasap habarlaidy.
Oqiǵa biyl 14 sáýirde Taraz qalasyndaǵy Abai atyndaǵy mamandandyrylǵan mektep-gimnaziiasynda bolǵan.
Jasóspirimniń anasy Zýhra Kárimovanyń aitýynsha, birneshe oqýshy onyń ulyn "sóilesemiz" degen syltaýmen kiim aýystyratyn bólmege shaqyrǵan. Bólmede ony birneshe jasóspirim kútip turǵan.
"Shabýylǵa úshten beske deiin jasóspirim qatysty. Aldymen Damirdiń kózine temir zatpen soqqy jasap, keiin birnesheýi jabylyp urdy. Balam jerge qulap, qarsylasýǵa shamasy qalmasa da, soqqyny toqtatpaǵan", – dedi anasy.
Jasóspirimge úsh ret ota jasalǵan
Otbasynyń málimetinshe, shabýyl jasaǵandar zardap shekken oqýshyǵa kómek kórsetpei, bólmede jalǵyz qaldyryp ketken. Alǵan jaraqatynyń saldarynan Damir sol kózinen tolyq aiyrylǵan. Osy ýaqytqa deiin oǵan úsh ret operatsiia jasalǵan.
Jasóspirimniń anasy istiń bastapqyda qylmystyń aýyrlyǵyna sáikes kelmeitin bappen tirkelgenin aitady. Qala prokýratýrasyna júgingennen keiin is Qylmystyq kodekstiń 106-babynyń 2-bóligi – densaýlyqqa qasaqana aýyr ziian keltirý baby boiynsha qaita saralanǵan.
Alaida jábirlenýshi tarap tergeý áli de tolyq júrgizilmedi dep esepteidi.
"Balamnyń jaýaby men basqa da dálelderge qaramastan, oqiǵa adamdar toby jasaǵan qylmys retinde qarastyrylmai otyr. Dárigerler kózge temir zatpen soqqy jasalýy múmkin degen qorytyndy bergenimen, oǵan da tiisti quqyqtyq baǵa berilgen joq. Materialdyq jáne moraldyq shyǵyndy óndirý týraly talap qoidyq, biraq kúdiktiler áli azamattyq jaýapker retinde tanylmady", – deidi otbasy músheleri.
Kúdikti úiqamaqqa alynǵan
Jambyl oblysynyń prokýratýrasy densaýlyqqa aýyr ziian keltirý deregi boiynsha negizgi tergeý aiaqtalǵanyn habarlady.
Kúdikti ustalyp, keiin mamandandyrylǵan tergeý sotynyń sheshimimen eki aiǵa úiqamaqqa alynǵan. Saraptamalar júrgizilip, kýálardan jaýap alynǵannan keiin onyń áreketi Qylmystyq kodekstiń 106-babynyń 2-bóligi boiynsha túpkilikti saralanǵan.
Qazir qylmystyq is Taraz qalasynyń prokýratýrasyna joldanǵan. Materialdar zerdelengen soń sońǵy protsessýaldyq sheshim qabyldanady. Sonymen qatar prokýratýra jábirlenýshini ózge oqýshylardyń da urýy múmkin degen derek boiynsha jeke qylmystyq is qozǵalǵanyn rastady. Ol Qylmystyq kodekstiń 293-babynyń 2-bóligi – aldyn ala sóz bailasqan adamdar toby jasaǵan buzaqylyq boiynsha tergelip jatyr.
Tergeý múddesine bailanysty istiń ózge mán-jailary jariialanbaidy.
Mektep basshylyǵyna tártiptik jaza qoldanyldy
Oqiǵadan keiin mektepte Oqý-aǵartý ministrliginiń tekserýi júrgizilgen.
Jambyl oblysy bilim basqarmasynyń málimetinshe, qyzmettik mindetterin tiisinshe oryndamaǵany úshin mektep direktory Indira Nuralievaǵa qatań sógis jariialanǵan. Quqyqtyq máseleler jónindegi direktor orynbasary da qatań sógis alyp, qyzmetinen bosatylǵan.
Mektep psihologyna, synyp jetekshisine, dene shynyqtyrý pániniń muǵalimine, áleýmettik pedagog pen aǵa tálimgerge de tártiptik jaza qoldanylǵan.
Bilim basqarmasynyń basshysy Nurbek Orshybekov mektepte býllingtiń aldyn alýǵa baǵyttalǵan keshendi jumystar júrgizilgenin aitty. "Býllingsiz bolashaq" treningine 97 oqýshy qatysyp, 270 ata-anamen kezdesý ótkizilgen. Sondai-aq oqýshylar arasynda saýalnama júrgizilip, jeke jáne toptyq keńester uiymdastyrylǵan.
Otbasy balany shetelde emdetýdi josparlap otyr
Damir Almatydaǵy Qazaq kóz aýrýlary ǵylymi-zertteý institýtynyń baqylaýynda bolǵan. Alaida anasynyń sózinshe, qazaqstandyq dárigerler endi kómektesý múmkindigi joq ekenin aitqan.
Otbasy Koreia men Túrkiiadaǵy klinikalarǵa ótinish joldap, jaýap alǵan. Qazir sheteldegi emge qajetti qarajat máselesin sheship jatyr.
"Osy ýaqytqa deiin de kóp shyǵyn shyqty. Endi qarajat jinaýǵa týra kelýi múmkin", – dedi Zýhra Kárimova.
