Taraz qalasynda bank bólimsheleriniń biriniń mańynan 35 jastaǵy kásipker Elnur Maımaqovtyń máıiti tabyldy. Onyń basynan oq jaraqaty anyqtalǵan, dep habarlaıdy Dalanews.kz.
Polısıa málimetinshe, marqum oqıǵa aldynda tanysynyń úıinde bolǵan. Ekeýiniń arasynda qaryz máselesine baılanysty janjal týyndaǵan.
Janjaldan keıin olar syrtqa shyqqan. Sol kezde er adam qarý shyǵaryp, qarsylasyna qaraı eki ret oq atqanymen, eshkim zardap shekpegen. Arada birneshe mınýt ótken soń taǵy bir oq daýysy estilgen.
Keıin kásipkerdiń denesin onyń tanysy tapqan. Ol marqummen birge tańǵy namazǵa barmaq bolǵan. Belgili bolǵandaı, qaıtys bolar aldynda er adam dosyna habarlasyp, ózin jaqyn mańdaǵy dámhanadan alyp ketýin suraǵan.
Oqıǵa ornynan tirkelmegen travmatıkalyq tapansha tárkilendi. Qazir is boıynsha tergeý amaldary júrgizilip jatyr.
«Tarazda er adamnyń denesi tabylýyna baılanysty Qylmystyq kodekstiń 105-baby – “Ózin-ózi óltirýge deıin jetkizý” boıynsha qylmystyq is qozǵaldy. Kúdikti anyqtalyp, ýaqytsha ustaý ızolátoryna qamaldy. Qazirgi ýaqytta istiń mán-jaıyn jan-jaqty, tolyq ári obektıvti anyqtaýǵa baǵyttalǵan tergeý amaldary júrgizilýde», – dep habarlady Taraz qalasy PD.
Sondaı-aq polısıa tergeý múddesine baılanysty ózge aqparattyń jarıa etilmeıtinin atap ótti.
Keıbir málimetterge sáıkes, is boıynsha basty fıgýrant Almas Qyryqbaev bolýy múmkin. Buǵan deıin onyń esimi «Qyryqbaevtar» uıymdasqan qylmystyq tobyna qatysty atalǵan. Alaıda bul aqparatty quqyq qorǵaý organdary resmı túrde rastaǵan joq.
