Tarazda 29 jastaǵy Dýman esimdi azamat aýyr soqqydan keiin aýrýhanada qaitys boldy. Marqumnyń ápkesi qaiǵyly oqiǵanyń qalai bolǵanyn baiandady, dep habarlaidy dalanews.kz.
Qumash derekkóziniń málimetinshe, Dýman aýrýhanada jumys istegen. Bir kúni emdelýshileriniń biriniń burynǵy kúieýi oǵan qaita-qaita telefon soǵyp, balaǵattap, kezdesýge shaqyrǵan.
"Marqumnyń týystary kezdesýge úsh jigit kelgenin aitady. Olar Dýmandy basynan uryp, kóliktiń júksalǵyshyna kúshtep salǵan. Keiin Asa ózeniniń mańyna aparyp, qatty soqqyǵa jyqqan degen boljam bar", - deidi derekkóz.
Osydan keiin es-tússiz jatqan Dýmandy óziniń kóligine salyp, aýrýhanaǵa jetkizgen. Týystarynyń sózinshe, kúdiktiler dárigerlerge ony kósheden taýyp alǵandaryn aitqan. Alaida Dýman esin jimastan kóz jumdy.
Marqumnyń ápkesi politsiia bastapqyda úsh adamdy ustaǵanyn, biraq keiin olardyń ekeýi bosatylǵanyn málimdedi. Sondai-aq negizgi kúdikti burynǵy áieline, iaǵni Dýmannyń emdelýshisine birneshe ret qol kótergenin aitty.
Týystary Dýman men álgi áieldiń arasynda jumystan tys eshqandai qarym-qatynas bolmaǵanyn jetkizdi. Olardyń aitýynsha, telefondaǵy hat almasýlar da osyny rastaidy.
Dýman eki kúnnen keiin 30 jasqa tolar edi. Onyń artynda kishkentai eki qyzy qaldy. Marqumnyń otbasy oqiǵaǵa qatysy bar adamdardyń barlyǵyn anyqtap, zań aldynda jaýapqa tartýdy talap etip otyr.
