Taraz qalasynda áieldiń eki kámeletke tolmaǵan balasyn besinshi qabattyń terezesinen laqtyryp jiberý deregi boiynsha QR Qylmystyq kodeksiniń 99-baby 3-bóligimen sotqa deiingi tergeý bastaldy. Bul týraly bala quqyqtary jónindegi ýákil Dinara Zákieva málimdedi, dep habarlaidy Dalanews.kz.
Balalar Jambyl oblystyq kópsalaly balalar aýrýhanasyna jetkizilgen. Ombýdsmenniń aitýynsha, óńirlik ýákil balalardyń jaǵdaiymen arnaiy baryp tanysqan.
«Ul balanyń jaǵdaiy qanaǵattanarlyq, al qyz balanyń jaǵdaiy aýyrlaý, súiek synýy bar. Anasynyń buryn aýyr depressiialyq jaǵdaiy anyqtalǵan, alaida emdeý tolyq kólemde aiaqtalmaǵan», – dep jazdy Zákieva.
Ombýdsmen balalardy qorǵaý isindegi eń kúrdeli máselelerdiń biri – meditsinalyq qupiia ekenin atap ótti. Onyń aitýynsha, dál osy sebepti densaýlyq saqtaý organdary aýyr depressiialyq jaǵdaiy bar nemese psihikalyq densaýlyqqa bailanysty esepte turǵan ata-analarmen birge turatyn balalar týraly balalardyń quqyqtaryn qorǵaý organdaryna aqparat bermeidi.
«Qatygezdik pen kisi óltirýdiń ondaǵan deregi osyndai jaǵdailarmen bailanysty. Balalardy qorǵaý fýnktsiiasyn atqaratyn organdar qajet bolǵan jaǵdaida otbasyna baryp, tiisti shara qoldanýy úshin aqparatqa ie bolýy tiis. Bul máseleni zańnamalyq deńgeide sheshý qajet dep sanaimyn», – dedi bala quqyqtary jónindegi ýákil.
Zákievanyń málimetinshe, kún saiyn balalarǵa qatysty zorlyq-zombylyqqa bailanysty orta eseppen bes qylmys tirkeledi. Mundai qylmystardyń 60–70 paiyzy jaqyn týystar – anasy, ákesi nemese jaqyn ortasyndaǵy adamdar tarapynan jasalady.
Ombýdsmenniń sózinshe, mundai qaýipterdi aldyn ala anyqtaý óte qiyn, sebebi qylmystardyń basym bóligi úi ishinde, jabyq esiktiń artynda jasalady.
Osyǵan bailanysty 2024–2025 jyldary qabyldanǵan zańdar aiasynda táýekelderdi erte anyqtaýǵa, otbasylarǵa kómek kórsetýge baǵyttalǵan birqatar jańa quraldar engizilgen. Ótken jyly mobildi toptar 13 myń otbasyn anyqtap, olardy otbasyny qoldaý ortalyqtarynyń súiemeldeýine bergen. 111/QR 111 arqyly 1130 zorlyq-zombylyq deregi tirkelgen. Sonymen qatar 29 myń ata-ana ata-analyq mindetterin oryndamaǵany úshin jaýapkershilikke tartylyp, 1126 adam ata-ana quqyǵynan aiyrylǵan, 661 adamnyń quqyǵy shektelgen.
Sonymen birge, ótken jyldyń qorytyndysy boiynsha aýyr qylmystardy anyqtaý kórsetkishi artqanymen, jynystyq qolsuǵýshylyq, kisi óltirý jáne ólimge ákep soqqan aýyr dene jaraqattaryna qatysty asa aýyr qylmystar 6%, 10% jáne 54%-ǵa tómendegen.
