تاراز قالاسىندا ايەلدىڭ ەكى كامەلەتكە تولماعان بالاسىن بەسىنشى قاباتتىڭ تەرەزەسىنەن لاقتىرىپ جىبەرۋ دەرەگى بويىنشا ق ر قىلمىستىق كودەكسىنىڭ 99-بابى 3-بولىگىمەن سوتقا دەيىنگى تەرگەۋ باستالدى. بۇل تۋرالى بالا قۇقىقتارى جونىندەگى ۋاكىل دينارا زاكييەۆا مالىمدەدى، دەپ حابارلايدى Dalanews.kz.

بالالار جامبىل وبلىستىق كوپسالالى بالالار اۋرۋحاناسىنا جەتكىزىلگەن. ومبۋدسمەننىڭ ايتۋىنشا، وڭىرلىك ۋاكىل بالالاردىڭ جاعدايىمەن ارنايى بارىپ تانىسقان.

«ۇل بالانىڭ جاعدايى قاناعاتتانارلىق، ال قىز بالانىڭ جاعدايى اۋىرلاۋ، سۇيەك سىنۋى بار. اناسىنىڭ بۇرىن اۋىر دەپرەسسيالىق جاعدايى انىقتالعان، الايدا ەمدەۋ تولىق كولەمدە اياقتالماعان»، – دەپ جازدى زاكييەۆا.

ومبۋدسمەن بالالاردى قورعاۋ ىسىندەگى ەڭ كۇردەلى ماسەلەلەردىڭ ءبىرى – مەديسينالىق قۇپيا ەكەنىن اتاپ ءوتتى. ونىڭ ايتۋىنشا، ءدال وسى سەبەپتى دەنساۋلىق ساقتاۋ ورگاندارى اۋىر دەپرەسسيالىق جاعدايى بار نەمەسە پسيحيكالىق دەنساۋلىققا بايلانىستى ەسەپتە تۇرعان اتا-انالارمەن بىرگە تۇراتىن بالالار تۋرالى بالالاردىڭ قۇقىقتارىن قورعاۋ ورگاندارىنا اقپارات بەرمەيدى.

«قاتىگەزدىك پەن كىسى ءولتىرۋدىڭ ونداعان دەرەگى وسىنداي جاعدايلارمەن بايلانىستى. بالالاردى قورعاۋ فۋنكسياسىن اتقاراتىن ورگاندار قاجەت بولعان جاعدايدا وتباسىنا بارىپ، ءتيىستى شارا قولدانۋى ءۇشىن اقپاراتقا يە بولۋى ءتيىس. بۇل ماسەلەنى زاڭنامالىق دەڭگەيدە شەشۋ قاجەت دەپ سانايمىن»، – دەدى بالا قۇقىقتارى جونىندەگى ۋاكىل.

زاكييەۆانىڭ مالىمەتىنشە، كۇن سايىن بالالارعا قاتىستى زورلىق-زومبىلىققا بايلانىستى ورتا ەسەپپەن بەس قىلمىس تىركەلەدى. مۇنداي قىلمىستاردىڭ 60–70 پايىزى جاقىن تۋىستار – اناسى، اكەسى نەمەسە جاقىن ورتاسىنداعى ادامدار تاراپىنان جاسالادى.

ومبۋدسمەننىڭ سوزىنشە، مۇنداي قاۋىپتەردى الدىن الا انىقتاۋ وتە قيىن، سەبەبى قىلمىستاردىڭ باسىم بولىگى ءۇي ىشىندە، جابىق ەسىكتىڭ ارتىندا جاسالادى.

وسىعان بايلانىستى 2024–2025 جىلدارى قابىلدانعان زاڭدار اياسىندا تاۋەكەلدەردى ەرتە انىقتاۋعا، وتباسىلارعا كومەك كورسەتۋگە باعىتتالعان ءبىرقاتار جاڭا قۇرالدار ەنگىزىلگەن. وتكەن جىلى ءموبيلدى توپتار 13 مىڭ وتباسىن انىقتاپ، ولاردى وتباسىنى قولداۋ ورتالىقتارىنىڭ سۇيەمەلدەۋىنە بەرگەن. 111/QR 111 ارقىلى 1130 زورلىق-زومبىلىق دەرەگى تىركەلگەن. سونىمەن قاتار 29 مىڭ اتا-انا اتا-انالىق مىندەتتەرىن ورىنداماعانى ءۇشىن جاۋاپكەرشىلىككە تارتىلىپ، 1126 ادام اتا-انا قۇقىعىنان ايىرىلعان، 661 ادامنىڭ قۇقىعى شەكتەلگەن.

سونىمەن بىرگە، وتكەن جىلدىڭ قورىتىندىسى بويىنشا اۋىر قىلمىستاردى انىقتاۋ كورسەتكىشى ارتقانىمەن، جىنىستىق قولسۇعۋشىلىق، كىسى ءولتىرۋ جانە ولىمگە اكەپ سوققان اۋىر دەنە جاراقاتتارىنا قاتىستى اسا اۋىر قىلمىستار 6%، 10% جانە 54%-عا تومەندەگەن.