Taraz irgesindegi eldi mekender áli kúnge sýsyz otyr. Milliondaǵan qarjy quiylǵan sý qubyry bar bolǵany sheneýnikterdiń esebinde ǵana sairap tur. Al shyntýaityna kelsek, Bektóbe men Qyzylsharyq turǵyndary jiyrma jyl boiy kóshedegi jalǵyz kolonkaǵa qarap qalǵan, dep habarlaidy Dalanews.kz.
KTK telearnasynyń málimetinshe, o basta sý osy jyldyń sáýirinde ár úidiń aýlasyna jetedi degen edi. Ol merzim jazdyń sońyna qarai syrǵyp, jurt taǵy da shelegin súiretip álekke túsip júr. «Qurylys bitýge jaqyn» degenge senim az, sebebi topyraq arasynan bei-bereket shlangiler shyǵyp, álden qudyqtardyń qaqpaqtary qirap jatyr. Sapasyz atqarylǵan jumystyń saldary erteń taǵy da eldiń bas aýrýyna ainalmaq.
Al qyzyǵy sol – merdiger kompaniianyń esebi boiynsha, nysan 97 paiyzǵa daiyn tur. Jambyl aýdandyq ákimdiginiń turǵyn úi-kommýnaldyq sharýashylyq bóliminiń basshysy Maqsat Úsembaev «Sý qabyldaý jumystary júrip jatyr, tamyz aiynda turǵyndardyń úilerine sý tolyq jetkiziledi», – dep ant-sý iship otyr. Ol azdai, ákimdik astanaǵa joldaǵan esepte qubyrlardyń iske qosylǵany týraly súiinshi habar da jetken. Tek aýyldaǵy aǵaiynnyń shelegi áli qurǵaq, júikeniń de juqaryp bara jatqanyn ákimdik eskermese kerek.
«Sheneýnikterdiń sózi – dalbasa áńgime! Kózimiz kórip otyr ǵoi, eki aýylda da bir tamshy sý joq. Salynǵan dúnieniń sapasy mynaý bolsa, erteń taǵy qansha jyl jyr bolary belgisiz», – deidi jergilikti turǵyn Zytýla Raiymberdiev.
Ákimdik máseleniń baryn jartylai moiyndap, «kei jerlerde olqylyq anyqtalǵanyn» aitady. Olqylyqtar qysqa ýaqytta joiylýy tiis eken. Sonymen qatar, merdiger kompaniia nysandy bes jyl boiy kepildikpen jóndep turýǵa mindetti.
Mundai jaǵdai tek Jambyl oblysynda emes. Almaty irgesindegi Kemertoǵan aýylynyń halqy da sýǵa jarymai otyr. Onda qubyr eskirip, júie isten shyqqan. Birneshe kóshege aýyz sý múldem jetpei qalǵan.
Jiyrma jyl boiy sýdyń sybyryna zar bolǵan eldiń bul jolǵy úmiti aqtala ma, álde sol baiaǵy bos áýrege salyna ma, ony da ýaqyt kórseter. Biraq sheneýnikterdiń qaǵazdaǵy esebi men aýyldaǵy shyndyqtyń arasy tym alshaq ekeni anyq.
