تاراز ىرگەسىندەگى ەلدى مەكەندەر ءالى كۇنگە سۋسىز وتىر. ميلليونداعان قارجى قۇيىلعان سۋ قۇبىرى بار بولعانى شەنەۋنىكتەردىڭ ەسەبىندە عانا سايراپ تۇر. ال شىنتۋايتىنا كەلسەك، بەكتوبە مەن قىزىلشارىق تۇرعىندارى جيىرما جىل بويى كوشەدەگى جالعىز كولونكاعا قاراپ قالعان، دەپ حابارلايدى Dalanews.kz.
كتك تەلەارناسىنىڭ مالىمەتىنشە، و باستا سۋ وسى جىلدىڭ ساۋىرىندە ءار ءۇيدىڭ اۋلاسىنا جەتەدى دەگەن ەدى. ول مەرزىم جازدىڭ سوڭىنا قاراي سىرعىپ، جۇرت تاعى دا شەلەگىن سۇيرەتىپ الەككە ءتۇسىپ ءجۇر. «قۇرىلىس بىتۋگە جاقىن» دەگەنگە سەنىم از، سەبەبى توپىراق اراسىنان بەي-بەرەكەت شلانگىلەر شىعىپ، الدەن قۇدىقتاردىڭ قاقپاقتارى قيراپ جاتىر. ساپاسىز اتقارىلعان جۇمىستىڭ سالدارى ەرتەڭ تاعى دا ەلدىڭ باس اۋرۋىنا اينالماق.
ال قىزىعى سول – مەردىگەر كومپانيانىڭ ەسەبى بويىنشا، نىسان 97 پايىزعا دايىن تۇر. جامبىل اۋداندىق اكىمدىگىنىڭ تۇرعىن ۇي-كوممۋنالدىق شارۋاشىلىق ءبولىمىنىڭ باسشىسى ماقسات ۇسەمبايەۆ «سۋ قابىلداۋ جۇمىستارى ءجۇرىپ جاتىر، تامىز ايىندا تۇرعىنداردىڭ ۇيلەرىنە سۋ تولىق جەتكىزىلەدى»، – دەپ انت-سۋ ءىشىپ وتىر. ول ازداي، اكىمدىك استاناعا جولداعان ەسەپتە قۇبىرلاردىڭ ىسكە قوسىلعانى تۋرالى ءسۇيىنشى حابار دا جەتكەن. تەك اۋىلداعى اعايىننىڭ شەلەگى ءالى قۇرعاق، جۇيكەنىڭ دە جۇقارىپ بارا جاتقانىن اكىمدىك ەسكەرمەسە كەرەك.
«شەنەۋنىكتەردىڭ ءسوزى – دالباسا اڭگىمە! كوزىمىز كورىپ وتىر عوي، ەكى اۋىلدا دا ءبىر تامشى سۋ جوق. سالىنعان دۇنيەنىڭ ساپاسى مىناۋ بولسا، ەرتەڭ تاعى قانشا جىل جىر بولارى بەلگىسىز»، – دەيدى جەرگىلىكتى تۇرعىن زىتۋلا رايىمبەردييەۆ.
اكىمدىك ماسەلەنىڭ بارىن جارتىلاي مويىنداپ، «كەي جەرلەردە ولقىلىق انىقتالعانىن» ايتادى. ولقىلىقتار قىسقا ۋاقىتتا جويىلۋى ءتيىس ەكەن. سونىمەن قاتار، مەردىگەر كومپانيا نىساندى بەس جىل بويى كەپىلدىكپەن جوندەپ تۇرۋعا مىندەتتى.
مۇنداي جاعداي تەك جامبىل وبلىسىندا ەمەس. الماتى ىرگەسىندەگى كەمەرتوعان اۋىلىنىڭ حالقى دا سۋعا جارىماي وتىر. وندا قۇبىر ەسكىرىپ، جۇيە ىستەن شىققان. بىرنەشە كوشەگە اۋىز سۋ مۇلدەم جەتپەي قالعان.
جيىرما جىل بويى سۋدىڭ سىبىرىنا زار بولعان ەلدىڭ بۇل جولعى ءۇمىتى اقتالا ما، الدە سول باياعى بوس اۋرەگە سالىنا ما، ونى دا ۋاقىت كورسەتەر. ءبىراق شەنەۋنىكتەردىڭ قاعازداعى ەسەبى مەن اۋىلداعى شىندىقتىڭ اراسى تىم الشاق ەكەنى انىق.
