Tanymal telejýrnalist Erqanat Kópjasar "Qazaqstan" arnasynyń Almaty filialyna direktor boldy, dep habarlaidy dalanews.kz.
Búgin Qazaqstan respýblikalyq teleradiokorporatsiiasy tóraǵasynyń orynbasary Aizada Jamanqulova "Qazaqstan" RTRK" Almaty qalasyndaǵy filialy ujymyna jańa basshysyn tanystyrdy. Ol - jýrnalist, "Tańsholpan", "Kesh jaryq, Qazaqstan", "Ashyq alań" habarlarynyń júrgizýshisi bolǵan Erqanat Kópjasaruly.
Erqanat Kópjasaruly 1987 jyly dúniege kelgen. Ál-Farabi atyndaǵy Qazaq ulttyq ýniversitetin jýrnalistika mamandyǵy boiynsha támamdaǵan.
Eńbek jolyn 2012 jyly Qazaq radiosynyń «Áleýmet» redaktsiiasynda redaktor bolyp bastaǵan. Keiin Qazaq radiosynyń Almaty stýdiiasynda redaktor qyzmetin atqardy. 2017-2022 jyldar aralyǵynda «31 kanal» teleradiokompaniiasynyń «Informbiýro» aqparattyq baǵdarlamalar bóliminde jetekshi tilshi boldy. 2022 jyldan beri «Qazaqstan» teleradiokorporatsiiasynda, «Qazaqstan» ulttyq telearnasynyń baǵdarlamalar óndirisi jónindegi direktsiiasynda prodiýser-júrgizýshi jáne «Ashyq alań» baǵdarlamasynyń júrgizýshisi qyzmetin atqaryp keldi.
Aita keteiik, «Qazaqstan» Ulttyq telearnasyn, «Balapan», «QAZSPORT», «Abai TV» telearnalaryn, «Agentstvo Televizionnyh Novostei» seriktestigin, Qazaq radiosyn, «Shalqar» Ulttyq arnasyn, «Classic» radiolaryn jáne aimaqtyq teleradiokompaniialardy biriktiretin «Qazaqstan» respýblikalyq teleradiokorporatsiiasy elimizdiń buqaralyq aqparat quraldary arasynda erekshe oryn alady. Mekeme Qazaqstandaǵy tele-radiojýrnalistikanyń úzdik dástúrin mura etip keledi. Onyń bastaýynda 1922 jyly negizi qalanǵan Qazaq radiosy men 1958 jyly qurylǵan respýblikalyq birinshi telearna tur.
