Otandyq kompozitor, Orda jáne Ninety One toptary oryndaǵan birqatar tanymal ánniń avtory Serjan Baqytjanuly dúnieden ozdy. Qaraly habardy onyń jaqyn dosy, ánshi Dastan Orazbekov áleýmettik jelidegi paraqshasynda jetkizdi, dep habarlaidy dalanews.kz.
Ánshi áriptesiniń qazasy qabyrǵasyn qaiystyrǵanyn aityp, onyń ónerdegi jáne ómirdegi ornyn erekshe atap ótti.
«Búgin ómirden meniń dosym, syrlasym, áriptesim, aqyldasatyn keńesshim, óner jolyn birge keshken aiaýly azamat – Serjan Baqytjanuly ótti», – dep jazdy Dastan Orazbekov.
Halyq súiip tyńdaǵan ánderdi jazdy
Serjan Baqytjanulynyń qalamynan Orda tobynyń «Qily zaman», «Ǵashyqsyń ba?», «Jaýap ber», «Taǵdyr» sekildi ánderi týǵan. Sondai-aq ol Ninety One tobyna arnap shyǵarmalar jazyp, Dastan Orazbekovtiń oryndaýyndaǵy «Kók aspan» ániniń avtory atandy.
Dastan Orazbekov kompozitordyń týyndylary onyń esimin el jadynda máńgi saqtaitynyna senim bildirdi.
«Seniń jazǵan ánderiń esimińdi máńgilikke qaldyrady. Halyqtyń júreginen oryn alǵan shyǵarmalaryń el aýzynda áli talai jyl aitylady», – dedi ánshi.
Ol Serjan Baqytjanulyn jomart minezdi, keń júrekti ári tereń oily azamat retinde eske aldy. Ánshiniń sózinshe, kompozitormen árbir kezdesý men áńgime ózine erekshe rýhani áser syilaǵan.
Dastan Orazbekov marqumnyń otbasy men týǵan-týystaryna kóńil aityp, onyń jany jánnatta bolýyn tiledi.
