Belgili zańger ári qoǵam belsendisi Aigúl Orynbek Talǵardaǵy tragediia kezinde qaza tapqan Sherzat Bolattyń aǵasynyń ólimine bailanysty pikir bildirdi. Ol bul oqiǵa bir otbasynyń tragediiasy emes, búkil qoǵamnyń qabyrǵasyn qaiystyryp ketkenin aitty, - dep habarlaidy Dalanews.kz.
Aigúl Orynbektiń sózinshe, qylmystyq oqiǵa bolǵannan keiin, otbasy múshelerine aýyr psihologiialyq júkteme túsedi.
"Ásirese, mundai jaǵdailarda psihologtardyń kómegi óte mańyzdy. Ókinishke orai, bizdiń qoǵamda adam ólimi oryn alǵan jerlerde psihologtardyń júieli túrde jumys istemeýi kúrdeli másele bolyp qala beredi. Jas balanyń qaitys bolýy otbasynyń ishki qarym-qatynasynda aýyrtpashylyq týǵyzdy. Mundai jaǵdaida, “eger sol túni bulai istemegende”, “men kinálimin” siiaqty ózara aiyptaýlar men ishki kúizelister sózsiz paida bolady. Osylaisha, otbasy músheleri bir-birin nemese ózderin kinálap, jaǵdaidy odan ári aýyrlatýy múmkin", - deidi zańger redaktsiia tilshisine bergen jaýabynda.
Zańger bul oqiǵada, atap aitqanda, myltyqtyń aǵasynyń qolynda bolǵany týraly málimetter bar ekenin atap ótti.
"Eger ol oqiǵa ornyna qarýdy alyp kelgen bolsa, onyń ózin-ózi kináli sezinýi múmkin. Ishki kinálaý sezimi ony osyndai qadamǵa itermeleýi yqtimal. Alaida, bul jaǵdai tek tergeý barysynda tolyq anyqtalýy kerek.
Dál qázir tergeý kezinde qysym jasalǵan-jasalmaǵany týraly suraq qoǵamda alańdaýshylyq týdyrady. Eger mundai jait oryn alǵan bolsa, baqylaýshy organdar, atap aitqanda prokýratýra, bul jaǵdaiǵa tiisti quqyqtyq baǵa berýi tiis. Bul oqiǵanyń qoǵam baqylaýynda ekenin umytpaǵan jón. Ashyqtyq pen ádildik printsipteri qatań saqtalýy kerek", - deidi Aigúl Orynbek.
Zańger mundai aýyr jaǵdailarda otbasyna tek advokattyń emes, psihologtardyń da kómegi qajet ekenin atap ótti.
"Qaiǵyǵa dýshar bolǵan adamdarǵa kásibi psihologiialyq qoldaý kórsetý olardyń aýyr jaǵdaidan shyǵýyna jáne qatelikter men qaitalanatyn tragediialardyń aldyn alýǵa yqpal etedi. Biz bul oqiǵany tek qaiǵy retinde emes, qoǵamdaǵy mańyzdy máselelerdi kórsetetin jaǵdai dep qabyldaýymyz kerek. Otbasyǵa kómek kórsetip, tergeýdiń ádildigine qol jetkizý - tek quqyq qorǵaý organdarynyń ǵana emes, búkil qoǵamnyń mindeti", - deidi Aigúl Orynbek.
Eske salaiyq, búgin Almaty oblysynda Sherzat Bolattyń aǵasy Nurqanat Ǵaiypbaev óli tabylǵan edi. Politsiia departamentiniń aldyn ala derekteri boiynsha, ol sýitsid jasaǵan. Oǵan dálel retinde politseiler Nurqanattyń týysyna messendjer arqyly jazǵan hatyn jariia etti.
Habarlamada ol týysqandarymen qoshtasyp, jieniniń janyna jerleýdi suraǵan.
Bul fakti boiynsha qylmystyq is qozǵaldy. Qazirgi ýaqytta barlyq jaǵdailardy anyqtaý úshin tergeý amaldary júrgizilip jatyr.
Sherzat Bolat tarapynyń advokaty Saida Táýekelova jasóspirimniń aǵasynyń óli tabylýyna qatysty málimdeme jasaǵan bolatyn.
Saida Táýekelova marqumnyń aǵasy Nurqanat Ǵaiypbaev kóz jumǵanyn rastady. "Chemodan gossekretov" telegram-arnasynda “Sherzat Bolattyń aǵasy tóbeles kezinde qarýdy birinshi alyp shyqqan, sol úshin ózin aiypty sezinip, óz-ózine qol salǵan” degen aqparat taraǵan.
"Marqumnyń tergeý barysynda bergen jaýaptarynan onyń qatty qobaljyǵanyn, inisiniń ólimine ózin kináli dep sanaǵanyn baiqaýǵa bolady. Sýitsid jasaýynyń da sebebi sol bolýy múmkin", delingen telegramdaǵy jazbada.
Advokat Táýekelova bul nusqany joqqa shyǵarǵan edi.
Al buǵan deiin Sherzat Bolat tarapynyń qorǵaýshysy Maral Jailaýbaeva qandy oqiǵa bolǵan túni kúdiktiler marqum Sherzattyń aǵasy Nurqanatty da óltirýge oqtalǵanyn aitqan edi.
“Biz Nurqanatty óltirýge oqtalý faktisi boiynsha tergeý organdaryna ótinish jiberdik. Kúdiktiler Nurqanatqa dene jaraqattaryn keltirip, 3-4 márte jambasy men tósine pyshaq suqqan. Atalǵan áreketter adamdy ómirinen aiyrýǵa tikelei baǵyttalǵan, iaǵni naqty nietpen jasalǵan dep esepteimiz. Bul ótinish qazir tergeý organdarymen qaralýda. Qylmystyq is boiynsha jábirlenýshiler men kúdiktilerdiń ortasynda bettestirý ótkizilip, qazirgi tańda taǵaiyndalǵan saraptamalardyń qorytyndylarymen biz tanysýdamyz”, - degen edi advokat.
