Kásipker Raiymbek Batalovtyń áieli Lenara Batalova Bishimbaev isine qatysty pikir bildirdi, - dep habarlaidy Dalanews.kz.
Aita keteiik, 1 sáýirde ótken sot otyrysynda Qýandyq Bishimbaev Saltanat Núkenova belgili kásipkerdiń kóńildesi bolǵanyn málimdegen bolatyn. Ol kásipker naqty kim ekenin aitpasa da esimi Raiymbek ekenin atap ótken bolatyn.
Kóptegen telegram arnalarda bul kásipker Raiymbek Batalov ekenin jarysa jazdy. Artynsha qazaqstandyqtar Batalovtyń áieli Lenara Batalovanyń paraqshasyna "shabýyl" jasap, kúieýi týraly pikir jaza bastaǵan bolatyn.
Búgin Lenara Batalova sot otyrysyna qatysty pikir bildirdi.
"Men bolǵan jaitqa qatysty pikir bildirsem dep edim. Sebebi meniń instagramym "jarylaiyn" dep tur. Keshe el bolyp atyshýly protseske kýá boldyq. Protsess 1 sáýirge sáikes kelip qaldy. Onyń mazmuny da soǵan sai bolǵan sekildi. Biz atyshýly isti emes, "Pýst govoriat" shoýyn kórip otyrǵandai boldyq. Sotta meniń otbasymnyń abyroiyna nuqsan keltirgen negizsiz, oiǵa qonymsyz nárselerge qatysty ne derimdi bilmeimin. Saltanattyń jaqyndaryna sabyr men kúsh-qýat tileimin jáne ádildik ornaidy dep senemin. Biz sizdermen birgemiz", - deidi Lenara Batalova.
Foto: instagram.com/batalova_lenara
Raiymbek Batalov - quramyna Raimbek Agro, Raimbek Group Plus, City Fair Trade ltd, Raimbek Bottlers Group kompaniialary kiretin Raimbek Group holdinginiń iesi jáne direktorlar keńesiniń tóraǵasy.
«Atameken» UKP tóralqa tóraǵasy jáne basqarma múshesi, direktorlar keńesiniń múshesi – «Damý» Federaldyq investitsiialyq qory» AQ táýelsiz direktory, Qazaqstan Respýblikasy Prezidentiniń janyndaǵy Sheteldik investorlar keńesiniń múshesi, Ulttyq komissiia múshesi Quryltai jáne Qazaqstan Respýblikasy Prezidentiniń janyndaǵy reformalar jónindegi Joǵarǵy Keńes. Qazaqstannan ShYU Iskerlik keńesiniń tóraǵasy, «Qazaqstan kásipkerleriniń forýmy» qaýymdastyǵynyń basqarma tóraǵasy. Qazirgi tańda «Atameken» tóralqasynyń tóraǵasy.
Aita keteiik, Bishimbaevtyń sózinshe, Saltanat Qazaqstanda tanymal otbasyly adammen kezdeskenin moiyndaǵan.
"Sol kúni keshke ol maǵan moiyndady. Men odan nege bulai júikesi syr berip júrgenin suradym. Odan túsindirip berýin suradym. Toidan keiin 3-4 kún ótken edi. Ol meniń kabinetimde bir adamnyń sýreti turǵanyn aitty. Sýrette men onymen birge (Núkenova aityp otyrǵan adammen birge - esk.) túskenmin. Ol bir kezderi sol kisiniń ashynasy bolǵanyn aitty. Men onymen tanyspyn. Árine, bul aqparat meni eseńgiretip tastady.
Odan 20 jastai úlken, 4 balasy bar, Qazaqstanda kádimgidei tanymal adam. Tek esimin aitaiyn, onyń esimi - Raiymbek.
Men renjidim, ol adamdy bilemin. Jumys boiynsha bir kezderi kezdeskenbiz. Ortaq tanysymyz da kóp. Bizde bir-birimizge bárin ashyq aitatyn ýaqyt bolǵan kezde olai istemegenine renjidim. Odan nege aitpaǵanyn suradym. Ol "bul bizdiń qarym-qatynasymyzǵa áser etedi" dep qoryqqanyn jetkizdi", - dedi Bishimbaev.
Sonymen qatar, buryn da sotty bolǵan eks-ministr ózge de adamdardyń esimderin atady. Onyń sózinshe, Saltanat otbasyly adamdarmen kezdesken.
1 sáýirde ótken sot otyrysynda Qýandyq Bishimbaev Saltanat Núkenovamen qarym-qatynasy týraly óz nusqasyn aitqan bolatyn. Sonymen qatar, Bishimbaev sotta Saltanattyń jeke ómirindegi burynǵy jaittar týraly da aitty.
Odan bólek, Bishimbaev iske qatysty aqparattar burmalanǵanyn málimdedi.
Endigi sot otyrysy 3 sáýirde 10.00-de bolady.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
