Belgili bloger Beibit Álibekov áleýmettik jelide jigittiń TikTok-taǵy baiqaý úshin video túsirýge kóligin suraǵanyn aitty. Alaida túsirilim kezinde jigit jaraqat alyp, qaitys boldy, - dep habarlaidy Dalanews.kz.
Beibit Álibekovtiń sózinshe, túsirilim Almaty oblysy Ile aýdanyndaǵy "Suńqar" avtodromynda bolǵan. Blogerdiń ózi qaiǵyly oqiǵaǵa qatysty pikir bildirdi.
"Kóligimdi qoimai surap júrgen Batyrhan Erjan deitin jigit esterińizde me? Bermei qoiǵan edim. Telegram-da pikirtalas boldy. (...) Aqyry kólikti triýgi úshin berdim. ...Bir triýkti qaitalaǵysy keldi. Qaitalai almady. Aýyr jaraqat alyp, aýrýhanaǵa tústi. Al búgin tańerteń, ókinishke qarai, ol dúnieden ótti. Aitarǵa sózim joq. Jaqyndary men týystaryna kóńil aitamyn. Oǵan kólikti bermei-aq qoiýym kerek pe edi?" - dedi Álibekov.
Birneshe kún buryn Beibit Álibekov óziniń Telegram-daǵy oqyrmandary arasynda "Bul jigitke túsirilim úshin kólikti bereiin be?" dep saýalnama da júrgizgen.
Almaty oblysynyń Politsiia departamenti ókilderi qaiǵyly oqiǵaǵa pikir bildirdi.
"29 qazanda avtodrom aýmaǵynda 22 jastaǵy jigit video túsirilimi kezinde triýk jasaimyn dep, abaisyzda 45 jastaǵy júrgizýshi aidaǵan kóliktiń astyna tústi. Saldarynan zardap shekken adam aýdandyq aýrýhanaǵa jatqyzyldy, ol 30 qazanda esin jimastan qaitys boldy", - dep jazylǵan habarlamada.
Oblystyq Politsiia departamenti avtodromdaǵy oqiǵaǵa qatysty qylmystyq is qozǵalyp, tergeý júrip jatqanyn málimdedi.
