Qazaqstanda 2026 jylǵy tamyzda turǵyn úidi satyp alý-satý boiynsha 35 807 mámile tirkelip, bul kórsetkish shildemen salystyrǵanda 3,6%-ǵa tómendedi, dep habarlaidy dalanews.kz.
Shildede el boiynsha 37 158 turǵyn úi mámilesi jasalǵan bolatyn.
Mámileler sany boiynsha Almaty qalasy kósh bastap tur – 7 690 mámile nemese jalpy kórsetkishtiń 21,5%-y. Ekinshi orynda Astana – 6 398 mámile (17,9%), al úshinshi orynda Qaraǵandy oblysy – 2 825 mámile (7,9%). Eń az kórsetkish Ulytaý oblysynda tirkeldi – 277 mámile, iaǵni jalpy kólemniń 0,8%-y.
Shildemen salystyrǵanda turǵyn úi mámileleriniń eń joǵary ósimi Almaty qalasynda baiqaldy – 5,9%. Sondai-aq Qostanai oblysynda mámileler sany 5,5%-ǵa, Qaraǵandy oblysynda 5,1%-ǵa artty.
Al eń úlken tómendeý Almaty oblysynda tirkeldi – 21,1%. Atyraý oblysynda mámileler sany 15,7%-ǵa, Jambyl oblysynda 13,7%-ǵa azaidy.
Kóppáterli úilerdegi turǵyn úi boiynsha tamyz aiynda 27 719 mámile jasaldy. Bul shildemen salystyrǵanda 3%-ǵa nemese 856 mámilege az.
Páterler boiynsha jasalǵan mámileler turǵyn úi naryǵyndaǵy barlyq mámileniń 77,4%-yn qurady. Kóppáterli úilerdegi turǵyn úi saýdasynyń negizgi úlesi Almaty men Astana qalalaryna, sondai-aq Qaraǵandy oblysyna tiesili.
Atap aitqanda, Almatynyń úlesi 26%, Astananyń úlesi 22,6%, Qaraǵandy oblysynyń úlesi 8,4% boldy.
Bólmeler sany boiynsha eń kóp satylǵany – bir bólmeli páterler. Tamyzda mundai páterler boiynsha 10 806 mámile tirkeldi.
Jeke turǵyn úiler boiynsha da mámileler sany azaidy. Tamyzda bul segmentte 8 088 mámile jasalyp, shildemen salystyrǵanda kórsetkish 5,8%-ǵa nemese 495 mámilege tómendedi.
Jeke turǵyn úiler boiynsha mámileler sanynyń eń joǵary ósimi Qyzylorda oblysynda tirkeldi – 7,8%. Qaraǵandy oblysynda ósim 6,3%, Jetisý oblysynda 2,7% boldy.
Al eń úlken tómendeý Shyǵys Qazaqstan oblysynda baiqaldy – 15%. Almaty qalasynda jeke turǵyn úi mámileleri 14,6%-ǵa, Aqtóbe oblysynda 12,3%-ǵa azaidy.
Jalpy, 2026 jylǵy tamyzdaǵy turǵyn úidi satyp alý-satý mámileleriniń sany ótken jyldyń sáikes aiymen salystyrǵanda 13,5%-ǵa tómendedi. 2025 jylǵy tamyzda 41 380 mámile tirkelse, biyl bul kórsetkish 35 807-ge deiin tústi.
Ótken jyldyń tamyzymen salystyrǵanda mámileler sany eń kóp ósken óńir – Túrkistan oblysy. Onda ósim 9,8% boldy. Al eń joǵary tómendeý Astana qalasynda tirkeldi – 32,3%.
2026 jyldyń qańtar-tamyz ailaryndaǵy turǵyn úi mámileleriniń jalpy sanyn 2025 jyldyń osy kezeńimen salystyrǵanda 4,3%-ǵa tómendeý baiqalady.
