14 jylǵa bas bostandyǵynan aıyrylǵan burynǵy ulttyq kompanıa basshysy Talǵat Ermegıaevtiń uly – Mádı Ermegıaev jurtshylyqqa jáne memleket basshysyna úndeý jasady, dep habarlaıdy Dalanews.kz.
Mádı Ermegıaevtiń aıtýynsha, otbasy on jyl boıy ádilet izdep, úmitpen ómir súrip keledi.
1Ákem urlyq jasap baıyǵan joq. Kerisinshe, ol memleket qarjysyn qorǵaýǵa tyrysqany úshin sottaldy. Ahmet Baıtursynuly aıtqandaı, «aq qaǵazǵa qara sıamen jazylǵan shyndyqty qyzyl tilmen kómip tastaı almaısyń». Biz búgin sol shyndyqty ashý úshin jınaldyq. Ákem osy ýaqyt ishinde týǵan-týystarynan jyraqta, temir tordyń ar jaǵynda ómir súrdi. Balalarynyń balalyq shaǵy men nemereleriniń dúnıege kelý sátterin kóre almady1, – dedi ol.
Mádı anasynyń densaýlyǵyna alańdaýly ekenin de aıtty.
"Anamyz uzaq jyldan beri sırek kezdesetin aýtoımmýndy aýrýmen – tórtinshi dárejeli ókpe sarkoıdozymen kúresip keledi. Bul dert oǵan kúızelistiń saldarynan kelgen. Sońǵy eki jylda ol tek ottegi apparatymen tynys alyp, kún saıyn ókpeniń jumysyn qoldaıtyn gormonaldy dáriler iship júr. Ol kún saıyn kúıeýiniń bostandyqqa shyǵyp, otbasyna oralǵanyn tilep, duǵa etedi. Ákemniń ata-anasy da jasy kelip qalǵan shaqta jalǵyz ulyn taǵatsyzdana kútip otyr. Olar úmitin úzbeı, onyń aman-esen oralýyn kútýde. Ákem 14 jyldyq jaza merziminiń 10 jylyn ótep úlgerdi. Ol zańdy qorǵaýdy tańdady, únsiz qalǵan joq. Memleket múddesi úshin áreket etti. Alaıda onyń áreketi úshin oǵan qysymmen qoldan jasalǵan aıyp taǵyldy. Endi bizde shyndyq pen ádilettilikke bastar naqty bir qadam jasaýǵa múmkindik bar — dálelsiz, qısynsyz, shyndyqqa janaspaıtyn isti qaıta qaraý", – dedi Mádı.
Mádı Ermegıaev ádilet – tek bir otbasynyń ǵana kúresi emes ekenin atap ótti.
"Prezıdentimiz aıtqandaı, jańa Qazaqstan – bul eń aldymen ádiletti Qazaqstan. Bul – bir otbasynyń ǵana emes, barsha halyqtyń ádiletke degen seniminiń synaǵy. Sondyqtan da beı-jaı qaramaıtyn barsha azamattarǵa úndeý jasaımyn: bul isti zertteńizder, bólisińizder, aıtyp júrińizder. Sebebi ádilet úshin únsizdik – ádiletsizdikke seriktes bolý degen sóz. Ákemniń bostandyqqa shyǵýy – tek otbasymyzdyń armany emes, bul eldegi ádildiktiń ornaýyna jasalǵan naqty qadam bolady.
Mádı Ermegıaev Memleket basshysy Qasym-Jomart Toqaevqa arnaıy úndeý jasap, kómek surady.
"Qurmetti Qasym-Jomart Kemeluly, men, Ermegıaev Mádı, sizge el Konstıtýsıasynyń kepili retinde júginemin. Ákem Talǵat Ermegıaev jazyqsyz on jylǵa jýyq ýaqyt túrmede otyr. Osy jyldar boıy ol otbasymen birge bola almady: balalary ósti, nemereleri dúnıege keldi, ata-anasy qartaıdy, anamyz aýyr dertke shaldyqty. Sizdiń ádilet pen adamgershilikke negizdelgen ustanymyńyz úshin alǵys aıta otyryp, osy iske nazar aýdaryp, ádil sheshim shyǵarýǵa yqpal etýińizdi suraımyn", – dedi ol.
Aıta keteıik, 2016 jyldyń tamyzynda Astana qalasynyń qylmystyq ister jónindegi aýdanaralyq mamandandyrylǵan soty «Astana EKSPO-2017» ulttyq kompanıasynyń burynǵy basshysy Talǵat Ermegıaevti 14 jylǵa bas bostandyǵynan aıyrǵan bolatyn.
