Túrkıa quzyrly organdary Antaláda ustalǵan Talǵat Ardandy kóp uzamaı Qazaqstanǵa ekstradısıalaýǵa qarsy emes. Beıresmı kanaldar arqyly Reseı jaǵy da Ardan máselesine endigi qyzyqpaıtynyn jetkizgen, - deıdi DALA INSIDE derekkózi.
«Rosatomnyń Qazaqstandaǵy birinshi AES-ti salatyny jarıalanǵansha, «Ardan-Tasmaǵambetov» faktory Kremldiń qolyndaǵy djoker bolyp otyrǵan. Astana jaqsy dıplomatıalyq manevr jasaǵandyqtan, endi Tas kartasymen oınaý Reseı úshin qısynsyz. Sondyqtan ol kún tártibinen ketedi. Biraq Sol jaǵalaý 2027 jylǵa deıin «Tasmaǵambetov máselesin» birjaqty qylýy tıis», - deıdi, derekkóz.
Máseleni Imanǵalı Nurǵalıuly tarapynan «prezıdenttik saılaýǵa qatyspaımyn» degen garantıa alý arqyly sheshýge bolady. Biraq, is nasyrǵa shaýyp bara jatsa, Aqordanyń qolyndaǵy kompromat papkasy aýyrlaý bolý úshin qylmysker dep tanylǵan LRT-nyń burynǵy basshysy Talǵat Ardannyń "pokazanıesi" kerek ekeni túsinikti. Reseı Ardannyń Túrkıadan ekstradısıasyn jasyryn tejemeıtin bolsa, 2027 jylǵa deıin osy papkany tolyqtyryp qoıýǵa múmkindik bar.
«Negizgi jáne eń qundy kýáger Talǵat Ardan emes, LRT-nyń izdeýde júrgen sońǵy fıgýranty Qanat Sultanbekov. Ol AQSH-ta jasyrynyp júr. Tasmaǵambetovke qarsy jazǵan haty buqaralyq aqparat quraldarynda jarıalandy. Eger «Jańa Qazaqstan» onymen kelisimge kelip, elge aldyryp, tergeýge kelistirse, naǵyz qajet málimetter sol kezde paıda bolady. Sebebi Qanat Sultanbekov Tasmaǵambetovtyń Astana qalasynyń ákimi kezinde orynbasary bolyp qyzmet etti. Ol shynymen de kóp nárse biledi», - deıdi, derekkóz.
LRT – Qazaqstandaǵy korrýpsıanyń eskertkishi retinde tarıhta qalǵan joba. Onymen baılanysqan kez-kelgen saıasatkerdiń qoly bylǵanady. Jáne úlken saıası ambısıalaryn tejep qoımaq.
Bıyl qysta Imanǵalı Tasmaǵambetov ODKB tóraǵasy qyzmetin bosatady. Ary qaraı Qazaqstan bul saıasatkermen ne isteıdi degen suraq týyndaıdy. Nurǵalıulyna Eýrazıalyq ekonomıkalyq komısıany basqartý boıynsha birshama ıdeıalar bar. Salmaqty bedelin Odaqtaǵy Qazaqstan pozısıasyn qorǵaýǵa paıdalaný boıynsha da oılar aıtylǵan.
Tek bir zat túsiniksiz bolyp tur. Tasmaǵabetovke qazaq múddesi jaqyn ba, álde Reseı múddesi jaqyn ba? Osy suraqta áli kúnge deıin konsensýs tabylmady.
