Talǵarda 16 jastaǵy Sherzatty óltirdi dep aıyptalyp jatqan kúdiktilerdiń sýreti áleýmettik jelide jappaı taralyp ketti, dep habarlaıdy Dalanews.kz.
QirSabyn telegram arnasy birneshe kúdiktiniń sýreti men olardyń esimin jarıalaǵan. Derekkózdiń málimetinshe, kúdikteler 1993, 1998 jáne 2000 jylǵy azamattar. Olardyń ekeýi buryn sottalǵan.
“Bir bótelke syra úshin Sherzatty óltirgen qylmyskerlerdiń bet-beınesi - osy. Búkil el 16 jastaǵy Sherzattyń qazasyn estip, shýlap jatyr. Mine, osy 13 eresek adam marqum Sherzattyń ákesin uryp, aǵasyn pyshaqtap ketken. Al anasy osy sáttiń kýási boldy. Balasynyń jaýyzdyqpen ajal qushqanyn óz kózimen kórdi. Onyń qandaı kúıde bolǵanyn sózben jetkizý múmkin emes”, - deıdi QirSabyn telegram arnasy.
Sonymen qatar tóbeleske eki qyzdyń da atsalysqany aıtylǵan.
“Eki qyz pyshaq ustap, ákesiniń balasyna kómek kórsetýine kedergi keltirgen. Qazirgi tańda sýrette kórsetilgen 7 adam ustalǵan. Al eki qyz kýáger retinde qarastyrylyp jatyr. Qalǵan tórteýi prokýratýradaǵy tanystarynyń arqasynda bostandyqta júr”, - dep qosty arna.
Osy tusta QirSabyn telegram arnasy kópshilikti bul iske beı-jaı qaramaýǵa shaqyrdy.
“Bul - maqsatty túrde jasalǵan toptyq qylmys. Sol sebepti ashyq sotqa ábden laıyq. Elimizdiń tanymal tulǵalary men blogerleri osy isti ilgeriletýge atsalyssa deımiz. Bul da Saltanattyń jaǵdaıyna uqsas. Ádildikti birge talap eteıik! 13 adam zań aldynda jaýap berýi kerek!”, - dep túıindedi arna.
Eske salaıyq, qaıǵyly oqıǵa 4 qazanǵa qaraǵan túni bolǵan edi. Sýyq qarý asynǵan bir top jigit marqum jasóspirimge, onyń aǵasy men ákesine shabýyl jasaǵan.
Sherzattyń ákesi jalǵa dúken alyp, saýda jasaýmen aınalysatyn. Arty ólimmen aıaqtalǵan tóbeles osy dúkennen bastalǵan.
Bir jigit dúkenge kelip, bir quty syra alyp, aqshasyn tólemeı kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.
Sherzat osy sátte klıenttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen.
Bir top jigit Sherzatty tepkileı bastaǵan. Bul sátti turǵyndar vıdeoǵa túsirip alǵan. 10-shy synypta oqıtyn Sherzat ata-anasynyń dúkenine kezdeısoq kelgen. Sýyq qarýmen kelgen buzaqylar eshkimdi aıamapty. Qansyraǵan bir otbasynyń músheleri aýrýhanaǵa jetkizilgen. Kóp uzamaı Sherzat jansaqtaý bóliminde kóz jumǵan.
Osy tusta marqumnyń ápkesi Baqyt Reımova polıseıler tóbeleske qatysýshylardyń bárin áli qamaýǵa almaǵanyn aıtady. Ol quzyrly organdardan kúdiktilerdiń bárin ustap, kórsetýin talap etip otyr.
"Eger rezonans jasamasaq, bizdi eshkim estimeıdi. İnim áskerı qyzmetker bolǵysy keldi. Qanshama armandary ishinde ózimen birge ketti. Sondaı ókinishti jaǵdaı. Bulaı bolmaýy kerek edi", - deıdi Baqyt Reımova.
Onyń aıtýynsha, Sherzatty kúdiktiler aıýandyqpen óltirgen. Qansyrap jatqanynda kúdiktilerdiń bireýi artynan kelip, avtomatpen urǵan eken.
"Máıitti óz kózimmen kórdim. Balanyń basy qaq aıyrylyp ketken. 30-ǵa kelgen erkekter 16-daǵy jasóspirimge jabylǵan. Ákesin sabap, baýyrymdy úsh jerden pyshaqtap ketken. Bir syra bermegeni úshin óldi. Masqara ǵoı. Ákesine qorǵan bolǵany úshin óltirip ketti. Endi olardy nege shyǵaryp jiberedi? Ádildik qaıda? Qaı memlekette ómir súrip jatyrmyz? Osylaı bizdiń balalarymyz ólip kete bere me? Bul ne degen sumdyq?", - deıdi marqumnyń ápkesi.
Sherzattyń týystary keminde 13 kúdikti baryn aıtady. Alaıda polısıa 7 adamdy ǵana ustapty. Oqıǵa ornynda bolǵan Sherzattyń ákesi de málimdeme jasady. Ol ádil sot talap etti.
Oqıǵaǵa İshki ister mınıstri Erjan Sádenov pen Almaty oblysynyń prokýratýrasy pikir bildirdi.
“Almaty oblysynyń Talǵar aýdanynda oryn alǵan kámeletke tolmaǵan balanyń ólimine qatysty mán-jaılar meniń jeke baqylaýymda. Oqıǵa ornynda birinshi orynbasarymnyń basshylyǵymen İİM qyzmetkerlerinen quralǵan top jumys isteýde. Kináliler tıisti jazasyn alady”, - dedi Sádenov.
Sonymen qatar búgin, 8 qazan kúni, Almaty oblysynyń prokýratýrasy Talǵar qalasynda kámeletke tolmaǵan jasóspirimniń ólimine qatysty málimdeme jasady.
Aıtýlarynsha, qylmys qatań baqylaýǵa alynǵan.
“Biz dúıim jurttyń alańdaýshylyǵyn túsinemiz. Marqumnyń otbasy men jaqyndaryna qaıǵyra kóńil aıtamyz. Resmı túrde málimdeımiz, bul qylmys prokýratýra qyzmetkerleriniń erekshe baqylaýyna alynǵan”, - delingen prokýratýranyń habarlamasynda.
Sondaı-aq prokýratýranyń málimetinshe, qylmysqa kúdikti retinde jeti adam ustalyp, olarǵa sot tarapynan eki aı merzimge qamaqqa alý týraly sanksıa berilgen.
“Barlyq jaǵdaıdy anyqtap, kinálilerdi jaýapqa tartýǵa baǵyttalǵan obektıvti tergeýdi qamtamasyz etemiz. Barlyq azamatqa ýáde beremiz, bul qylmysqa qatysy bar tulǵalarǵa jazadan jaltarýǵa múmkindik berilmeıdi”, - dep málimdedi prokýratýra ókilderi.
