تالعاردا 16 جاستاعى شەرزاتتى ءولتىردى دەپ ايىپتالىپ جاتقان كۇدىكتىلەردىڭ سۋرەتى الەۋمەتتىك جەلىدە جاپپاي تارالىپ كەتتى، دەپ حابارلايدى Dalanews.kz.

QirSabyn تەلەگرام ارناسى بىرنەشە كۇدىكتىنىڭ سۋرەتى مەن ولاردىڭ ەسىمىن جاريالاعان. دەرەككوزدىڭ مالىمەتىنشە، كۇدىكتەلەر 1993، 1998 جانە 2000 جىلعى ازاماتتار. ولاردىڭ ەكەۋى بۇرىن سوتتالعان. 

“ءبىر بوتەلكە سىرا ءۇشىن شەرزاتتى ولتىرگەن قىلمىسكەرلەردىڭ بەت-بەينەسى - وسى. بۇكىل ەل 16 جاستاعى شەرزاتتىڭ قازاسىن ەستىپ، شۋلاپ جاتىر. مىنە، وسى 13 ەرەسەك ادام مارقۇم شەرزاتتىڭ اكەسىن ۇرىپ، اعاسىن پىشاقتاپ كەتكەن. ال اناسى وسى ءساتتىڭ كۋاسى بولدى. بالاسىنىڭ جاۋىزدىقپەن اجال قۇشقانىن ءوز كوزىمەن كوردى. ونىڭ قانداي كۇيدە بولعانىن سوزبەن جەتكىزۋ مۇمكىن ەمەس”، - دەيدى QirSabyn تەلەگرام ارناسى.

سونىمەن قاتار توبەلەسكە ەكى قىزدىڭ دا اتسالىسقانى ايتىلعان.

“ەكى قىز پىشاق ۇستاپ، اكەسىنىڭ بالاسىنا كومەك كورسەتۋىنە كەدەرگى كەلتىرگەن. قازىرگى تاڭدا سۋرەتتە كورسەتىلگەن 7 ادام ۇستالعان. ال ەكى قىز كۋاگەر رەتىندە قاراستىرىلىپ جاتىر. قالعان تورتەۋى پروكۋراتۋراداعى تانىستارىنىڭ ارقاسىندا بوستاندىقتا ءجۇر”، - دەپ قوستى ارنا. 

وسى تۇستا QirSabyn تەلەگرام ارناسى كوپشىلىكتى بۇل ىسكە بەي-جاي قاراماۋعا شاقىردى.

“بۇل - ماقساتتى تۇردە جاسالعان توپتىق قىلمىس. سول سەبەپتى اشىق سوتقا ابدەن لايىق. ەلىمىزدىڭ تانىمال تۇلعالارى مەن بلوگەرلەرى وسى ءىستى ىلگەرىلەتۋگە اتسالىسسا دەيمىز. بۇل دا سالتاناتتىڭ جاعدايىنا ۇقساس. ادىلدىكتى بىرگە تالاپ ەتەيىك! 13 ادام زاڭ الدىندا جاۋاپ بەرۋى كەرەك!”، - دەپ تۇيىندەدى ارنا.

ەسكە سالايىق، قايعىلى وقيعا 4 قازانعا قاراعان ءتۇنى بولعان ەدى. سۋىق قارۋ اسىنعان ءبىر توپ جىگىت مارقۇم جاسوسپىرىمگە، ونىڭ اعاسى مەن اكەسىنە شابۋىل جاساعان.

شەرزاتتىڭ اكەسى جالعا دۇكەن الىپ، ساۋدا جاساۋمەن اينالىساتىن. ارتى ولىممەن اياقتالعان توبەلەس وسى دۇكەننەن باستالعان.

ءبىر جىگىت دۇكەنگە كەلىپ، ءبىر قۇتى سىرا الىپ، اقشاسىن تولەمەي كەتە بارعان. شەرزاتتىڭ اكەسى سىرانىڭ اقشاسىن تولەۋدى تالاپ ەتكەن كەزدە جانجال تۋىنداعان.

شەرزات وسى ساتتە كليەنتتىڭ دۇكەننەن شىعىپ كەتۋىن سۇراعان. ءبىراق سىرا العان جىگىت دوستارىنا قوڭىراۋ سوعىپ، دۇكەنگە ءۇش كولىكپەن ءبىر توپ جىگىت كەلگەن. 

ءبىر توپ جىگىت شەرزاتتى تەپكىلەي باستاعان. بۇل ءساتتى تۇرعىندار ۆيدەوعا ءتۇسىرىپ العان. 10-شى سىنىپتا وقيتىن شەرزات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى. قانسىراعان ءبىر وتباسىنىڭ مۇشەلەرى اۋرۋحاناعا جەتكىزىلگەن. كوپ ۇزاماي شەرزات جانساقتاۋ بولىمىندە كوز جۇمعان.

وسى تۇستا مارقۇمنىڭ اپكەسى باقىت رەيموۆا پوليسەيلەر توبەلەسكە قاتىسۋشىلاردىڭ ءبارىن ءالى قاماۋعا الماعانىن ايتادى. ول قۇزىرلى ورگانداردان كۇدىكتىلەردىڭ ءبارىن ۇستاپ، كورسەتۋىن تالاپ ەتىپ وتىر.

"ەگەر رەزونانس جاساماساق، ءبىزدى ەشكىم ەستىمەيدى. ءىنىم اسكەري قىزمەتكەر بولعىسى كەلدى. قانشاما ارماندارى ىشىندە وزىمەن بىرگە كەتتى. سونداي وكىنىشتى جاعداي. بۇلاي بولماۋى كەرەك ەدى"، - دەيدى باقىت رەيموۆا.

ونىڭ ايتۋىنشا، شەرزاتتى كۇدىكتىلەر ايۋاندىقپەن ولتىرگەن. قانسىراپ جاتقانىندا كۇدىكتىلەردىڭ بىرەۋى ارتىنان كەلىپ، اۆتوماتپەن ۇرعان ەكەن. 

"ءمايىتتى ءوز كوزىممەن كوردىم. بالانىڭ باسى قاق ايىرىلىپ كەتكەن. 30-عا كەلگەن ەركەكتەر 16-داعى جاسوسپىرىمگە جابىلعان. اكەسىن ساباپ، باۋىرىمدى ءۇش جەردەن پىشاقتاپ كەتكەن. ءبىر سىرا بەرمەگەنى ءۇشىن ءولدى. ماسقارا عوي. اكەسىنە قورعان بولعانى ءۇشىن ءولتىرىپ كەتتى. ەندى ولاردى نەگە شىعارىپ جىبەرەدى؟ ادىلدىك قايدا؟ قاي مەملەكەتتە ءومىر ءسۇرىپ جاتىرمىز؟ وسىلاي ءبىزدىڭ بالالارىمىز ءولىپ كەتە بەرە مە؟ بۇل نە دەگەن سۇمدىق؟"، - دەيدى مارقۇمنىڭ اپكەسى.

شەرزاتتىڭ تۋىستارى كەمىندە 13 كۇدىكتى بارىن ايتادى. الايدا پوليسيا 7 ادامدى عانا ۇستاپتى. وقيعا ورنىندا بولعان شەرزاتتىڭ اكەسى دە مالىمدەمە جاسادى. ول ءادىل سوت تالاپ ەتتى.

وقيعاعا ىشكى ىستەر ءمينيسترى ەرجان سادەنوۆ پەن الماتى وبلىسىنىڭ پروكۋراتۋراسى پىكىر ءبىلدىردى. 

“الماتى وبلىسىنىڭ تالعار اۋدانىندا ورىن العان كامەلەتكە تولماعان بالانىڭ ولىمىنە قاتىستى ءمان-جايلار مەنىڭ جەكە باقىلاۋىمدا. وقيعا ورنىندا ءبىرىنشى ورىنباسارىمنىڭ باسشىلىعىمەن ءىىم قىزمەتكەرلەرىنەن قۇرالعان توپ جۇمىس ىستەۋدە. كىنالىلەر ءتيىستى جازاسىن الادى”، - دەدى سادەنوۆ. 

سونىمەن قاتار بۇگىن، 8 قازان كۇنى، الماتى وبلىسىنىڭ پروكۋراتۋراسى تالعار قالاسىندا كامەلەتكە تولماعان ءجاسوسپىرىمنىڭ ولىمىنە قاتىستى مالىمدەمە جاسادى.

ايتۋلارىنشا، قىلمىس قاتاڭ باقىلاۋعا الىنعان.

“ءبىز ءدۇيىم جۇرتتىڭ الاڭداۋشىلىعىن تۇسىنەمىز. مارقۇمنىڭ وتباسى مەن جاقىندارىنا قايعىرا كوڭىل ايتامىز. رەسمي تۇردە مالىمدەيمىز، بۇل قىلمىس پروكۋراتۋرا قىزمەتكەرلەرىنىڭ ەرەكشە باقىلاۋىنا الىنعان”، - دەلىنگەن پروكۋراتۋرانىڭ حابارلاماسىندا.

سونداي-اق پروكۋراتۋرانىڭ مالىمەتىنشە، قىلمىسقا كۇدىكتى رەتىندە جەتى ادام ۇستالىپ، ولارعا سوت تاراپىنان ەكى اي مەرزىمگە قاماققا الۋ تۋرالى سانكسيا بەرىلگەن.

“بارلىق جاعدايدى انىقتاپ، كىنالىلەردى جاۋاپقا تارتۋعا باعىتتالعان وبەكتيۆتى تەرگەۋدى قامتاماسىز ەتەمىز. بارلىق ازاماتقا ۋادە بەرەمىز، بۇل قىلمىسقا قاتىسى بار تۇلعالارعا جازادان جالتارۋعا مۇمكىندىك بەرىلمەيدى”، - دەپ مالىمدەدى پروكۋراتۋرا وكىلدەرى.